DILI-(Desportu XYZ) Ekipa Karketu Dili Fc ne’ebé mak ho naran estimadu Matak Malirin konsege hetan vitória mihis 2-1 kontra Akademica Fc halo Karketu sei iha posibilidade ba kampiaun.
Jogu dramatika entre Karketu Dili Fc kontra Akademica Fc hala’o Estadiun Munisipal Dili, Kuarta (12/04)
Kick off Akademica Fc tun hala’o jogu ho bola rai halo Karketu Dili Fc ne’ebé mak tun ho tatika bola a’as difisil atu hetan bola tanba Akademica Fc halo suta ameasa beibeik bá guarda rede Georgino da Silva.
Karketu Fc ne’ebé mak la haforsa husi jogador prinsipál nain rua hanesan Paulo Galy Freitas no Arnol halo Karketu nia jogu monu iha liña klaran.
Akademica Fc domina liu bola, halo trenador Karketu tenki halo mudansa jogu hodi hasai Januari Fonseca hatama Gaudensio Monteiro hodi reforsa liña avansadu no Gelvanio Albertu muda husi avansadu bá mediu avasandu.
Ho mudansa hirak ne’e lori fali Karketu sai risku hodi hatudu fali sira nia jogu.
Maibé Akademica Fc mantein sira nia jogu hodi fó ameasa perigu dala rua bá rede Karketu liu husi Alexandre da Cruz iha liña penalidade kotuk, maibé bola rua ne’e sei hetan salva husi Georgino da Silva to’o primeira parte termina skor mantein 0-0.
Kontinua bá segunda parte, iha minutu 51 Augusto da Costa lori Karketu ukun ona bá 1-0, hafoin hetan asistensia husi Gaudensio Monteiro iha liña klaran hodi rejulta golu.
Ho golu ne’e halo armada Matak Malirin fiar a’an liu tan hodi hatudu sira nia jogu iha anin leten no Akademica Fc tenki muda sira nia jogu bola rai bá a’as hodi duni tuir skor.
Iha minutu balun Akademica Fc atu fura rede Karketu husi Alexandre da Cruz, maibé bola ne’ebé nia suta iha liña penalidade laran sei hetan salva husi Georgino da Silva.
Karketu fila lidera hikas Skor bá 2-0, wainhira Janneth Kámare fó asistensia bola cruza iha parte liman karuk bá Gaudensio Monteiro hodi fura guarda rede Akademica Fc Otilio Guterres iha minutu 64.
Akademica Fc esforsu makas hodi sobu liña defeza Karketu Dili, ikus mai konsege halo skor mihis bá 1-2 iha minutu 77, hafoin Lexi Junior lansa suta falta ne’ebé mak ho distansia dok halo guarda rede Georgino da Silva hakfodak bola monu ona iha rede laran.
Jogu kontinua manas liu tan bá ekipa rua, hafoin jogador Karketu Gaudensio Monteiro no jogador Akademica Lexi Junior hetan kartaun mean iha minutu 85 tanba jogador rua haksesuk malu iha kampu laran.
Laiha tan golu rua bá ekipa rua hodi termina jogu vitória bá Karketu Dili Fc.
Vitoria ne’e lori Karketu bá tur iha tabela klasifikasaun treseiru ho pontos 9, enkuantu Akademica Fc mantein ho pontos 5.
Entertantu Karketu Dili Fc hela jogu tolu kontra Asslama Fc, Ad SLB no Portu Taibesi.
Tabela Klasifikasaun LFTL Divizaun 1
About Post Author
