DILI-(Desportu XYZ) ekipa Nagardjo Fc foin rekolla vitória primeiru kontra adversariu Lica-Lica Lemorai FC ho Skor 4-1 iha jogu kontinuasaun segundu devizaun Liga Timorense Epoka 2022/2023.
Jogu entre Nagardjo Fc kontra Lica-Lica Lemorai hala’o iha Estadiun Munisipal Dili, Tersa (11/04).
Jogu foin hahú Nagardjo Fc atu doko ona rede Lica-Lica Lemorai husi Luis Soares hafoin nia doelu mesak ho guarda rede, maibé bola ne’ebé nia suta konsege salva husi Bendito Vila nova.
Ameasa ladura kleur, minutu haksoit bá 13 rede Lica Lica nakles husi Nelson Freitas, hafoin hetan asistensia bola husi nia kompaneru Luis Soares iha liña klaran hodi muda skor bá 1-0.
Lica-Lica lakoi rende hodi duni Skor, hafoin Ruben Borges lansa suta perigu ida iha liña penalidade kotuk, maibé sei salva husi guarda rede Nagardjo Fc Sandy Kurnia.
Nagardjo Fc halo ataka fila bá grande area defensivu Lica-Lica, hafoin Luis Soares kedok tia guarda rede Bendytu Vila Nova, maibé bola ne’ebé nia suta hetan salva husi deveza Elias Gomes.
Lica-Lica hakfodak ameasa hodi halo jogu monu, Nagardjo fila hurlele tan rede Lica-Lica husi Miguel Maskarinas iha minutu 35 tanba hetan asistensia bola husi Abrao Mendonsa hodi taka primeira parte ho skor 2-0.
Kontinua bá segunda parte, trenador Lica-Lica Lemorai Nelson Soares halo mudansa bá jogador hodi hasai Liborio Jeronimu hatama Inasio Magno hodi reforsa liña atakante.
Maibé mudansa ne’ebé mak Lica-Lica halo lori tan sofrementu, hafoin hetan golu rua tutuir malu husi Luis Soares menutu 70 no Abrao Mendonsa menutu 74.
Lica-Lica lakoi fila ho mamuk, ikus mai Andre Sarmento les duni rede Nagardjo Fc iha menutu 76 hodi taka segunda parte ho skor 1-4 vitória bá Nagardjo Fc.
Rezultadu ne’e lori Nagardjo Fc haksoit husi tabela klasifikasaun ikus hodi bá tur iha tabela klasifikasaun da lima ho pontus 5, enkuantu Lica-Lica Fc mantein iha terseru klasifikasaun ho pontus 7.
Tabela Klasifikasaun LFTL Divizaun 2
About Post Author
