(DTL-17/8/2020)-Antes ba konhese se maka Anuku, mai ita haree tok palvra sitasaun (quote) famozu ne’ebé Desportu.xyz foti hodi reflete viajen moris anuku nian ba iha karreira foun.
“ O sai ema iha loron ohin tanba o ninia desizaun rasik ne’ebé o rasik halo iha loron horisehik” (sitasaun deskoñesidu).
Moris ho idade 7 hela iha eskola Universidade Nasional Timor Lorosae UNTL oras ne’e hetan susesu sai arbritazen ho nivel D.
“Anuku” la’ós ema foun ba família futeból iha sidade Dili, Anuku maka joven idade nudar ransu ona iha klubu jigante no klube barak ne’ebé pertense ba universidade sira iha Dili, maibé famozu liu ho naran ‘Anuku Akadémika’.
Naran ne’e prega ba Anuku tanba prezensa barak liu ho ekipa Akademika FC bainhira kompete iha liga nasionál no mós jogu informal sira iha sidade Dili.
Nia naran kompletu, Abríl Dos Santos ho naran istimadu ‘Anuku’ moris iha munisipiu Liquisa orijen hosi suku Loidahar ho maun alin hamutuk na’in 10, nia hanesan oan mane dahuluk.
Ho idade tinan 7, Anuku hadook an hosi família muda mai sidade Dili, momentu ne’ebá Anuku desidi dalan hodi halai tuir estudante Esestajiadu Universidade Nasionál Timor Lorosa’e (UNTL) hodi mai hela de’it iha kampus UNTL.
“Ha’u iha hela UNTL sei ho idade tinan 7 hahú hosi 2010 hamutuk tinan 10 moris mesak ho pesoál seguransa sira iha UNTL,” haktuir Anuku ba Desportu.xyz foin lalais.
“Bainhira loron manas, oras hahú tuku sanulu resin rua ha’u hetan netik osan dolar ida hosi kolega sira hodi sosa netik dosi sentavu 50 no sentavu 50 rai ba han kalan,” haktuir Anuku ho espresaun triste hodi haree hikas ninia pasadu.
Loron komesa monu nakfilak ba kalan Anuku hateke ba kampus hanesan nia uma no perpara ona fatin hodi toba hamutuk ho seguransa ne’ebé mak halo serbisu kalan iha fatin refere.
Ropa ne’ebè mak nia uza lor-loron iha nia isin, hetan tolun hosi estudante balun ne’ebé mak uza ropa la to hodi fó ba nia atu troka malu ho ropa seluk.
Neineik ba neineik, tempu la’o, Anuku hola parte iha ofisial Akadémika FC, ninia servisu hanesan hili bola no hatama bola bainhira jogadór sira remata treinamentu.
“Osan ne’ebé mak ha’u hetan husi ekipa Akademia ho osan dolar 50, hoosan uitoan ne’ebé ha’u hetan hodi sosa netik farda eskola no sepatu,” haktuir joven ne’ebé ofrese vida tomak ba futeból ne’e.
Hafoin hadook an hosi Família no ladún hetan preokupasaun hosi família sira, nune’e “Agora sira la buka tuir, maibè ha’u deside hodi buka tuir fali sira hanesan ha’u nia aman no inan,” afirma Anuku hodi hanoin hela ninia família iha ninia knua moris.
Mane ne’ebé mak ho idade 19 oras ne’e hetan fiar hosi Maun Janio Tilman hodi selu nia eskola iha Nobel da Paz.
Foin lalais Anuku hetan oportunidade partisipa kursu arbitrajen iha Asosiasaun Futeból Dili Leste (AFDL), hosi partisipante na’in 25, anuku nudar ema ida hosi ema na’in lima ne’ebé finaliza fines test ho halai distánsia metru 400X100 iha estadium munisipál Dili foin lalais.
Ho susesu ne’e AFDL sertifika Anuku hanesan membru arrbitrjen iha Dili Leste.
Mezmu ho difikuldade no dezafiu motiva nafatin anuku hakat haree ninia futuru rasik ho bukae uitoan ne’ebé nia simu hosi AFDL, nia lidera ona jogu amizade entre ekipa kampiaun trible iha 2019 Lalenok United kontra Assalam iha kampu fatuhada. (*)
About Post Author
