DILI – Billete ba ekipa Asosiasaun Desportiva Sport Laulara Benfica (AD SLB) hodi hakat ba oitavu finais seguru ona hafoin manan jogu daruak hasoru Kablaki FC iha kopa FFTL 2020.
Jogu ne’ebé hala’o iha estádiu munisipál Dili, kuarta (09/09) SLB Laulara tun ho farda mean mutin ho kór azúl mihis no derije hosi árbitru Francisco Fereira.
Iha minutu Kick Off primeira parte, SLB lansa atake no domina bola iha area Kablaki FC hodi dudu beibeik bola tama iha area risku Kablaki nian.
Iha minutu 5, guarda rede Kablaki FC Mariano Martins mezmu hetan presaun halo netik salvasaun ‘saves’hodi baku bola sai mihis hosi rede leten bola ne’ebé surta hosi atiradór SLB, João Pedro besik area risku.
Iha minutu 11, sorte aat monu ba Kablaki-FC tanba liña kotuk hamonu hamonu João Pedro iha are 16 ho bola vantajen nune’e árbitru Francisco kastigu kedas Kablaki FC ho direct free Kick (penalty kick), João Pedro hanesan ezekutadór ho susesu loke golu dahuluk iha jogu ne’e.
Sorte aat nafatin ba Kablaki iha minutu 33, akontese atake hosi liman karuk SLB nian tun ba besik area risku bola ne’ebé shoot soe hosi liu tama ba area jogadór kamizola 2 (Martinho da Costa) la biban salva I hatama fali ba ninia rede rasik (auto golu), rezultadu ne’e mantein taka primeira parte jogu.
Jogu kontinua, minutu 5 inísiu segunda parte nian Kablaki FC halo duni jogada maibé finalizasaun laiha mezmu penetra to area risku laran.
Iha minutu 49 akontese advantage ba Kablaki FC liña kotuk SLB konsege hamonu jogadór Kablaki nian hodi dada atensaun lalais hosi árbitru Francisco fo prezente sutu penalidade ba Kablaki FC, jogadór Kazmizola 9, Kevin Fernandes foti bola ba tau iha pontu mutin hodi suta maibé bola semo aas mihis hosi besi leten.
Iha minutu 58, SLB Laulara aumenta tan golu, jogadór kamizola 10, mákina produtór golu SLB nian, Mouzinho de Lima lansa bola anin fuik ne’ebé satan la biban hosi guarda rede Mariano Martins.
Mariano tenke ba lalin tan bola dala ida hosi rede laran iha minutu 69, liu hosi bola pasajen hosi jogadór kamizola 18 (Filomeno da Costa) loke ba Kamizola 11, Kornelis Nahak Portela konverte golu dahaat nian hodi lori SLB Laulara lidera jogu 4-0 to’o árbitru Francisco ho minutu ikus nian hodi termina jogu. (Augusto)
About Post Author
