Desportu.Xyz- Ekipa Lika-Lika Fc konkista hikas pontu 3, hafoin halakon Santa Cruz Fc ho skor 2-1, iha jogu kontinuasaun jornada daruak, Liga Futebol Timor Leste ba 2º divizaun, époka 2022-2023.
Vitória armada Lika-Lika nian ne’e, fó risku Santa Cruz tama liña mean (degrdasaun) tanba ekipa Santa Cruz derrota ona iha jogu rua.
Jogu entre ekipa rua, Kuarta (09/03) ne’e, iha estádiu Munisipal Dili, foin iha primeira parte hahú, ekipa Santa Cruz hatudu sira nia ambisaun jogu atu bele ganha golu ho lais, maibé la iha vantajen atu hetan bola ho di’ak hodi bele fura uluk rede Lika-Lika nian.
Maske nune’e, sorte di’ak monu ba Santa Cruz, tanba hetan golu gratuitu (auto-golu) husi adversáriu nia jogador Elias Gomes (14), ne’ebé hatama rasik bola ba nia rede laran iha minutu “14”, hodi hatur skor ba Santa Cruz 1-0.
Auto-golu ne’e hanesan momentu tristeza ida ba ekipa Lika-Lika, hodi esforsu maka’as atu muda skor, maibé la iha oportunidade ho di’ak atu bele fura rede Santa Cruz nian.
Tanba ne’e to’o jogu primeira parte deskansa, provizóriu ba Santa Cruz ukun ho skor 1-0.
Hakat ba jogu segundu parte, ekipa rua nafatin halo atake ba malu, maibé la iha mudansa golu ruma.
Nune’e, atu muda skor refere, Lika-Lika Fc tenta muda nia jogu, no halo mós subtituisaun ba nia jogador sira, hafoin konsege muda skor hanesan 1-1, iha minutu “60”, liu husi jogador André Sarmento (7).
Iha ne’ebé, ekipa Santa Cruz lakohi derrota iha jogu ne’e, tenta atu aumenta tan golu ruma, maibé jogador liña avansadu sira la iha skil ne’ebé di’ak atu produs golu, maske lori bola besik liña 16 klaran.
Enkuantu, Lika-Lika Fc mós hakarak hetan vitória iha jogu refere, tanba ne’e kontinua halo subtituisaun ba nia jogadór sira, no fin iha minutu “70” Inácio Magno (6) les tan rede Santa Cruz nian, hodi muda skor 2-1.
Lori tristeza ba Santa Cruz, tanba sofre hikas golu, nune’e tenki esforsu maka’as atu halo impata, maibé sorte bola ba sira la mosu.
Tanba ne’e, to’o jogu entre ekipa rua oras remata, vitória ba Lika-Lika ukun ho rezultadu golu 2-1.
About Post Author
