Desportu.Xyz – Ekipa DIT Fc rekolla tan pontu 3, hafoin hurlele Nagardjo Fc ho skor 4-0, iha jogu jornada daruak, Liga Futebol Timor Leste (LFTL) ba 2º divizaun époka tinan 2022-2023.
Hafoin Nagardjo simu derrota, oportunidade ba kedas DIT provizóriu lidera tabele klasifikasaun ho pontu 6 iha jogu rua, ho golu hamutuk 6, enkuantu As Marca hetan pontu 6 ho de’it golu 3. Nune’e DIT provizóriumente okupa iha tabela klasifikasaun liga Timorense.
Jogu entre ekipa rua, Kuarta (08/03) ne’e iha estádiu Munisipal Dili, foin hahú sentra iha liña klaran, ekipa rua hatudu sira nia ritmu jogu diferente, tanba ekipa DIT hatudu sira nia jogu liu husi bola passagem husi ain ba ain, enkuantu Nagardjo Fc responde ho bola as.
Iha jogu ne’e, ekipa rua lansa bola no halo kontra atake ba malu atu produs golu ruma, maibé jogador liña avansadu sira la hetan bola ho di’ak tanba sei tenta husi liña defeza.
Hafoin iha minutu balun, DIT nia jogador, Romaric Monis (23) tenta lori bola tama to’o area penalidade Nagardjo Fc nian, maibe la konsege produs golu, tanba tenta husi liña defeza, nune’e halo bola halai ses de’it husi rin baliza nian.
Jogu kontinua ho intensidade manas liu tan, tanba ekipa Nagardjo Fc mós lakoi lakon ho nia adversáriu hodi koko sobu liña defeza DIT nian, no lansa mós bola dook, maibé guada rede DIT nian konsege salva bola ho di’ak.
Nune’e hakat ba iha minutu “27”, sorte ba ekipa DIT nia jogador, Serafim Brito (17), fura kedas rede Nagardjo Fc nian, hodi muda skor ba 1-0.
Sofre ba Nagardjo Fc, tanba simu ona golu dahuluk husi nia adversáriu, nune’e hodi esforsu maka’as no halo atake ba oin, maibé la iha dalan ba sira atu hakat liu liña defeza DIT Fc nian.
Mehi di’ak ba ekipa DIT Fc produs tan golu daruak ba skor 2-0, liu husi jogadór Elvis Silva (9), iha minutu “34”, hafoin aproveita bola muta sai, bainhira Lamberto Ximenes (28), lansa bola kona rin baliza Nagardjo Fc nian.
Golu daruak ne’e lori presaun ba ekipa Nagardjo, tenta esfosu no konsege lori bola tama to’o liña defeza DIT nian, maibé seidauk iha tarjetu ba finalizasaun bola ho di’ak. Tanba ne’e to’o jogu primeira parte deskansa, DIT provisóriu ho skor 2-0.
Hakat ba jogu segundu parte, ekipa Nagardjo Fc tenta troka nia jogador no halo mós mudansa ba jogu atu bele muda skor, maibé la dauk iha oportunidade ho di’ak, tanba liña defeza DIT nian mantein metin.
Enkuantu DIT Fc mós halo subtitusaun ba nia jogadór sira. No hakat ba iha minutu “76” DIT lidera tan golu datoluk hodi muda skor ba 3-0, liu husi jogadór Xavier Sila Bait (29).
Jogu kontinua manas tebes, tanba ekipa Nagardjo hahú halo subtitusaun ba nia jogador no halo mudansa ba sira jogu atu bele muda rezultadu golu, maibé sorte ba sira lá akontese, tanba tama to’o liña defeza DIT nian, lá konsege finaliza bola ho di’ak.
Nune’e to’o oras normal “90” minutu remata, hafoin hakat ba extra minutu “5” ekipa DIT susesu fura tan golu dahaat, ba skor 4-0, liu husi jogadór Xavier Sila Bait (29) iha minutu ikus, 90+2.
Tanba ne’e to’o jogu segundu parte termina, vitória ba DIT FC lidera skor 4-0 ba Nagardjo Fc. (Vidal Amaral).
Tabela Liga Timorense Divizaun 2 2022/2023
About Post Author
