Desportu.XYZ-Treinadór Lica-Lica FC, Nelson Soares rekoñese, nia ekipa derrota entre Fitun Estudante (Fiel) iha jogu jornada dahuluk ne’e, tanba nia ekipa liña avansadu seidauk iha finalizasaun ho di’ak.
Nune’e sira sofre golu rua hodi rezulta skor ba Fiel 2-0, iha jogu jornada dahuluk nian, iha Liga Timorense segundu divizaun époka 2022-2023.
“Ohin ami nia liña avansadu ne’e mak seidauk iha finalizasaun ho di’ak, tanba iha oportunidade barak maibé jogadór sira seidauk bele uza ho di’ak”. Hateten Treinadór ne’e hafoin jogu entre ekipa rua remata iha stadium Munisipal Dili, Dimindo (26/02).
Treinadór ne’e dehan, jogu sempre ida manan no lakon, tanba iha fallansu ruma ba oin sei hadi’a, tanba sei hela iha jogu neen tuir mai.
Iha fatin hanesan treinadór Fiel, Hermelio Conceição sente kontente tanba nia ekipa bele rekolla pontu 3.
“Ha’u agradese ba ekipa Lica-Lica, tanba sira mós joga di’ak, no ba oin ami mós sei prepara ho di’ak hodi hasoru jogu seluk tuir mai”. Dehan nia.
Jogu entre ekipa rua hahú, ekipa ida-idak hatudu sira nia jogu atu ganha vitória, maibé seidauk hetan oportunidade ho di’ak atu produs golu ruma.
Ekipa Fiel iha ambisaun hakarak produs uluk golu, hodi halo atake ba nia adversáriu, maibé liña defeza Lica-Lica nian mantén solidu.
Enkuantu ekipa Lica-Lica mós tenta husi liña ba liña atu ultrapasa defeza Fiel nian, maibé la iha dalan ba sira atu hakat liu.
Fiel tenta halo mudansa jogu, hodi troka nia jogador balun, atu bele halo mudansa ba skor, maibé seidauk hetan jogu ho di’ak.
Tanba ne’e to’o jogu primeira parte deskansa, ekipa rua mantein ho skor 0-0.
Hakat ba jogu segundu parte, ekipa rua nafatin halo kontra atake malu, no liu de’it iha minutu 50 Fiel muda kedas skor ba 1-0, hafoin hetan oportunidade sutu bola penalidade, ne’ebé ezekuta husi jogador Pedro Chances (28).
Golu refere halo Lica-Lica tenta esforsu no troka mós nia jogador balun, maibé lá iha rezultadu mudansa ruma husi sira nia ekipa.
Nune’e mós Fiel nafatin troka nia jogador, atu bele aumenta golu, maibé la hetan bola ho di’ak, tanba tenta husi nia adversáriu.
Hafoin iha minutu 90, ne’ebé hanesan oras terminasaun ba jogu, Fiel fura tan rede Lica-Lica nian, ba skor 2-0, liu husi jogador Avelino Gama (22), ho bola cabsada (ulun), bainhira ezekutador Angenuco Viegas (11) sutu bola kantu.
Nune’e to’o jogu oras termina, vitória ba Fiel ho skor 2-0 ba Lica-Lica Lemorai. (Vidal Amaral).
About Post Author
