Desportu.XYZ- Ekipa DIT Fc susesu rekolla pontu 3, hafoin halakon Zebra Fc ho skor 2-1, iha kompetisaun jogu segundu divizaun Liga Timorense époka 2022-2023, Sábadu (25/02) ne’e iha stadium Munsipal Dili.
Iha jogu primeira parte entre ekipa rua, hafoin bola sentra iha liña klaran, ekipa DIT Fc nia jogador Serafim Brito (44) lansa bola amiasa ba guarda rede Zebra nian, hafoin simu bola asistensia husi nia belun José do Santos (7) husi liña klaran.
Hafoin liu de’it iha oras segundu balun, DIT hetan oportunidade suta bola kantu liu husi ezekutador Ubaldo Belo (16) hodi hamosu bola barullu iha guarda rede oin Zebra nian, nune’e jogador Bonaventura Clau (44) aproveita hodi lansa kedas golu iha 0,45 segundu, ba rede Zebra nian hodi muda skor 1-0.
Golu refere halo ekipa Zebra tenta esfosu atu muda rezultadu, maibé la iha dalan ba sira atu liu liña defeza DIT nian.
Entretantu DIT mós nafatin halo atake ba nia adversáriu, nune’e mosu bola falta husi Bernadino Bas (23) tanba tenta hamonu Lamberto Ximenes (28) iha liña klaran, nune’e Lamberto Ximenes lansa bola dook husi rai hodi rezulta kedas golu iha minutu 12, hafoin simu bola husi Jose do Santos.
Golu DIT Fc nian ne’e hodi muda skor ba 2-0.
Sofre boot ba Zebra Fc iha jogu primeira parte tanba simu ona golu rua, nune’e ekipa representante husi Baucau ne’e tenta atu muda skor, maibé liña defeza DIT nian hatudu sira nia kapasidade ho di’ak hodi antisipa bola atu labele liu sira nia liña defeza.
Entretantu ekipa rua nafatin halo atake ba malu, nune’e to’o jogu primeira parte deskansa DIT mantein ho skor 2-0 ba Zebra Fc.
Hakat ba segundu parte, Zebra tenta muda jogu, maibé defeza DIT nian nafatin mantein liña metin.
Enkuantu DIT Fc hanesan ekipa ne’ebé foin tun husi primeira divizaun ba segundu divizaun husi kompetisaun liga Timorense époka 2021 nian ne’e, kontinu halo atake atu aumenta golu, maibé la iha oportunidade di’ak ba sira.
Oportunidade ba Zebra hodi muda skor 1-2, iha minutu 56 hafoin aproveita bola falta ne’ebé ezekuta husi jogador Leonel Gama (3) hodi lansa bola aas ba kedas Hélio Ribeiro (11) aproveita bola ulun hodi produs golu ba DIT nia rede laran.
Ekipa rua nafatin buka meiu oioin atu aumenta golu ruma, maibé ekipa ida-idak mantein sira nia liña.
Treinadór Zebra Fc, Rogério Mook, rekoñese, hanesan ekipa simu derrota ne’e, maibé derrota ne’e hanesan esperiensia ida atu hadi’a ba oin.
“ DIT nia nia preparasaun ne’e di’ak, kompara ho ami, tanba sira iha kampu rasik no sira prepara ne’e kleur, maibé ba oin ami sei iha esperansa atu manan iha jogu 6 tuir mai”. Dehan treinadór ne’e.
Iha fatin hanesan treinadór DIT Fc, Mial dehan maske hetan vitória, maibé nia parte seidauk kontente tanba nia jogador sira seidauk hatudu jogu ho di’ak tuir sira nia preparasaun.
“DIT nia preparasaun ne’e hakarak jogu ne’e labele iha de’it lina balun, ami nia preparasaun durante ne’e hakarak jogu hotu iha liña ba liña tenke la’o, maibé iha seidauk di’ak”. Dehan nia.
About Post Author
 hodi lansa bola aas ba kedas Hélio Ribeiro (11) aproveita bola ulun hodi produs golu ba DIT nia rede laran.){kind=link}