(Desporto.XYZ)- Ekipa Kablaki FC rekolla pontu 3, hafoin halakon nia adversáriu Nagardjo FC ho skor minis 1-0, iha Liga Timorense segundu divizaun époka 2022-2023, Sexta (22/02) ne’e iha stadium Munsipal Dili.
Iha jogu primeira parte hahú, ekipa rua lansa jogu diferente, entre Kablaki FC joga ho bola aas, maibé Nagardjo Fc responde ho bola rai husi ain ba ain hodi halo atake ba malu atu produs golu.
Maske ekipa rua atake malu, maibé la iha bola ameasa ba guarda rede, tanba ekipa rua joga kuaze hanesan atu labele ultrapasa bola liu liña defeza.
Hafoin liu minutu balun jogador Kablaki nian hetan bola mão, maibé arbítru Candido Carvalho la antisipa no lá hola desizaun ruma, hodi halo treinador Nagardjo Fc Octavianos Pinto hakilar ho liafuan tolok hodi halo assistente árbitro, Bernadino Mascarenhas komunika ho arbítru Candido hodi hiit kartaun mean ba Treinadór Nagardjo nian Octavianos Pinto sai husi stadium laran.
Nagardjo Fc tenta muda jogu, maibé la iha oportunidade di’ak atu liu defesa Kablaki Fc nian.
Enkuantu ekipa Kablaki lansa ho bola aas, maibé la iha dalan atu hakat liu liña defeza Nagardjo nian. Tanba ne’e to’o jogu primeira parte deskansa ekipa rua mantein 0-0.
Hakat ba jogu segundu parte, ekipa Kablaki tenta muda jogu hodi halo presaun ba nia adversáriu maibé seidauk iha oportunidade di’ak atu produs golu.
Nune’e mós ekipa Nagardjo esfosu hakarak muda skor maibé labele liu lina (16) Kablaki nian tanba sei hetan tenta husi defeza.
Hafoin liu minutu 68 mehi di’ak monu ba Kablaki Fc, liu husi nia jogador Juvito Nascimento (9) lansa golu liu husi bola barullu iha liña (16) laran hodi rejultadu golu no muda kedas skor ba 1-0.
Golu refere halo ekipa Nagardjo mós tenta hakarak muda rejultadu golu, maibé Kablaki Fc lá fó fatin Nagardjo hakat liu liña defeza.
Enkuantu Nagardjo tenta troka nia jogador husi lina balun, maibé la konsege muda skor.
Nune’e mós ekipa Kablaki hakarak mantein rejultadu golu ne’ebé sira produs, hodi troka nia liña defeza atu salva sira nia ekipa labele sofre golu.
Tanba ne’e to’o jogu segundu parte termina skor ba Kablaki FC 1-0 ba Nagardjo.
Asistente treinadór Nagardjo FC, Nidio Fraga rekoñese, hanesan ekipa simu realidade derrota, maibé derrota ne’e la’os ikus husi jogu, tanba ne’e nia garante jogu tuir mai sei hetan vitória.
“Jogu ohin ne’e ami nia ekipa joga di’ak, maibé tanba kondisaun udan halo ami la antisipa bola hodi rejulta golu, tanba ne’e ba oin ami sei hadi’a iha parte balun”. Dehan Asistente treinadór ne’e.
Enkuantu Treinadór Kablaki FC, Carlos Vilar sente apresia tanba nia ekipa bele hetan vitória.
“Jogu iha primeiru parte ami sente defisil, maibé ha’u nafatin fó motivasaun ba ha’u nia jogador katak halo sala ne’e normal, tanba nafatin joga ho di’ak. Tanba iha jogu segundu parte, jogu hahú moris no sira familiar tebes iha kampu laran hodi konsege produs golu, ha’u apresia. Dehan Treinadór ne’e. (Vidal Amaral).
About Post Author
