Dili-(Desportu XYZ) Klube DIT Fc kontinua perfeitu iha tabela klasifikasaun provezoriu segundu divizaun Liga Timorense epoka 2023 ho pontos 16, hafoin halakon nia adversariu Fitun Estudante Lorosae ho skor 5-0.
Jogu entre Fitun Estudante kontra DIT Fc hala’o iha estadiun munisipal Dili Segunda (24/04).
Jogu hahú DIT Fc ne’ebé mak tun ho jogador esperiénsia iha primeiru divizaun halo Fitun Estudante susar atu hetan bola husi DIT Fc ne’ebé halimar ain bá ain.
Jogu ladura kleur DIT Fc fura ona rede Fitun Estudante iha minutu 10 husi Bonaventura wainhira hetan bola husi Jose dos Santos iha liña penalidade kotuk hodi muda skor bá 1-0.
Simu ona golu ida, Fitun Estudante tenta sai husi presaun hodi hatudu sira nia tatika jogu soe bola bá iha area defensivu DIT Fc, maibé difisil liu tan bá sira atu ultrapasa hodi fura guarda rede Aderito Fernandes.
Atu termina primeiru parte, DIT Fc les rede Fitun Estudante dala rua tui-tuir malu liu husi Serafin Bretis minutu 28 no Elvis Silva iha minutu 45 to’o oras deskansa skor 3-0.
Kontinua bá segunda parte, trenador Fitun Estudante Hermelio José muda estrajia jogu hodi hasai defeza aumenta liña avansadu.
Mundansa ne’e, la dura bá sira nia ekipa tanba Bonaventura hakerek tan nia naran iha kuadro eskor ho golu rua iha minutu 45 no 86 no hat trick ba jogador kamizola 44 ne’e, skor muda ba 5-0 to’o jogu termina.
Vitória ne’e lori DIT Fc okupa fatin dahuluk iha tabela klasifikasaun provezoriu ho pontos 16, enkuantu Fitun Estudante ho pontos 8 no ida ne’e mak jogu ikus ba ekipa FIEL iha kompetisaun divizaun 2 Liga Timorense époka 2022/2023.
Tabela LFTL Divizaun 2 - 2022/2023
About Post Author
