Desportu.xyz- Ekipa Fitun Estudante (FIEL) lakon hikas pontu tolu, hafoin simu derrota husi nia adversáriu Zebra FC ho skor 1-0, iha jogu jornada daruak iha kompetisaun futebol Liga Timorense ba segundu divizaun ba époka 2022-2023, iha stadium Munsipal Dili, Segunda (06/03) ne’e.
Hafoin vitória ba Zebra, treinadór Rogério Mook apresia tanba nia ekipa bele rekolla hikas pontu 3 iha jogu daruak kontra FIEL.
“Ha’u apresia ba ami nia adeptu, tanba bele suporta ami nia ekipa, no ha’u mós apresia tanba ami bele rekolla fali pontu 3, tanba iha dahuluk ami lakon pontu 3 ho DIT FC, no iha jogu 5 tuir mai ami sei esforsu para manan, nune’e ami bele ba primeira divizaun”. Dehan treinadór ne’e.
Treinadór ne’e mós lamenta ho arbítru sira nia desizaun la professional, no sala sira ne’e atu kria de’it desentendimentu iha kampu laran.
Iha fatin hanesan, treinadór FIEL Hermenio Conceição rekoñese, derrota ho Zebra Fc tanba falla iha jogu segundu parte, hafoin bola ultrapasa husi liña klaran, nune’e hodi sofre golu.
Jogu ohin ne’e hanesan lisaun foun ida ba Ami, tanba ne’e ba oin ami sei hadi’a. Nia promete.
Jogu entre ekipa rua, iha primeira parte hahú ekipa rua tenta atake malu liu husi bola ain ba ain atu produs golu, maibé la iha oportunidade di’ak atu sutu bola ho finalidade.
Jogu foin liu de’it iha minutu “14”, Zebra hahú troka nia jogadór parte liña defeza Nicodemos Perreira (5) ne’ebé subtitui husi Gabriel Ximenes (21) atu hodi reforsa sira nia ekipa atu labele sofre golu.
Maske nune’e, ekipa rua la iha bola ameasa ba malu tanba ekipa rua sei mantém jogu primeira parte deskansa ho skor 0-0.
Hafoin hakat ba jogu segundu parte, ekipa rua tenta troka sira nia jogador, atu bele hetan jogu ho di’ak, maibé la iha oportunidade atu bele lori bola tama to’o área grade liña defesa.
FIEL hanesan ekipa ne’ebé antes ne’e rekolla ona pontu 3 husi Lika-lika iha jogu jornada dahuluk, tenta atu produs golu, maibé nia adversáriu sei maten liña defeza ho di’ak.
Enkuantu Zebra Fc hanesan ekipa ne’ebé derrota ona iha jogu jornada dahuluk kontra DIT mós esforsu atu muda skor, maibé la iha liña avansadu ida di’ak atu bele produs golu ruma.
Sorte ba Zebra Fc, hafoin iha minutu 88 jogador ho pozisaun liña defeza, Deonísio da Silva (17) hanesan suplentu ne’ebé troka jogador Juvêncio Cabral (22) lansa golu ba rede FIEL nian hodi muda skor ba 1-0.
Golu refere halo FIEL tenke esforsu makas atu halo impata iha minutu ikus ne’e, maibé la iha dalan ba sira atu lansa bola ba rede Zebra nian tanba sei tenta husi liña defeza.
Nune’e to’o jogu segundu termina, vitória ba Zebra ho rejultadu 1-0.
Enkuantu Zebra hala’o ona jogu ba daruka no lakon ida no manan ida ho pontu 3, enkuantu ekipa FIEL FC infrenta ona jogu rua ho pontu 3 tanba manan Lika-lika ho skor 2-0 no lakon hikas ho Zebra ho skor 1-0. (Vidal Amaral).
About Post Author
