Dili – Portu Taibesi divizaun segundu halakon ekipa bot kampian Liga Futebol Amadora edisaun daruak 2017 iha primeira divizaun Karketu Dili FC iha jogu ba daruak nian iha grupu C, ba Copa FFTL tinan ne’e.
Tuir treinadór FC Portu Taibesi Luis Simões katak, jogu entre ekipa rua joga ho ritmu hanesan, maibé sira manan liu husi fallansu balun ne’ebé ekipa adversáriu halo iha kampu laran.
“Ohin ami manan ne’e mós liu husi jogu ne’ebé sira falla, nune’e jogadór sira aproveita hodi lidera golu iha jogu primeira parte”. Hateten treinadór ne’e iha fatin konferénsia imprensa stadium Munísipal Dili-Sabadu (12/09/2020).
Luis Simões mós rekoñese, hakat ba jogu segundu parte ekipa Karketu atu hatama duni golu ba nia ekipa, maibé hetan salva husi baliza.
Tanba ne’e, treinadór ne’e afirma tan, maske manan iha jogu refere, maibé nia parte halo nafatin evaluasaun ba nia jogadór sira, nune’e fila fali atu hadi’a parte balun ne’ebé presiza hadi’a.
Enkuantu, treinadór ne’e mós argumenta liu tan, nia ekipa prontu atu hasoru ekipa ne’ebé de’it iha sira nia grupu.
Iha fatin hanesan kapitaun Portu Taibesi Octavio Mesquita mós apresia ho rejultadu ne’ebé sira hetan ho skor 1-0.
“Hau kontente tebes ho rejultadu ohin, tanba bele orienta jogadór sira rona malu hodi hetan rejultadu di’ak”, Hateten kapitaun Portu Taibesi.
Kapitaun ne’e mós promete, ba oin sira nafatin esforsu no prepara di’ak liu, nune’e bele hatudu rejultadu di’ak iha jogu tuir mai. (Vidal)
About Post Author
