Dili-(Desportu XYZ) jogador Edit Savio lori nia ekipa Emmanue Fc Hakotu Karketu Dili Fc nia mehi atu sai Kampiaun bá Liga Timorense Epoka 2022-2023, hafoin halakon Matak Malirin 1-0 iha jogu daruak ne’ebé mak hala’o iha estadiun munisipal Dili Kuarta (01/03).
Jogu hahú ekipa Emmanue Fc ne’ebé mak tun ho jogador maioria selesaun nasionál Sub 19 domina bola liu husi ain bá ain halo Karketu Dili Fc susar atu hetan bola.
Iha menutu 27 sorte a’at monu bá Karketu Dili Fc tanba deveza Domingos Ramos komete euru hodi hamonu avansadu Emmanuel Fc Edit Savio iha liña penalidade laran,halo Arbitu Romario dos Santo Teti desidi bá sota penalidade.
Jogador ho númeru kamizola 6 Zenidine Lopes sai hanesan ezekutador failha Marka golu,hafoin Guarda rede Karketu Dili Fc Georgino da Silva blokea bola sai bá li’ur.
Jogu kontinua manas liu tan,maibé Karketu Dili Fc ne’ebé mak haforsa husi jogador estranjeiru na’in rua no jogador singante Paulo Galy labele hatudu sira nia jogu tanba Liña deveza Emmanuel la fó oportunidade bá sira atu ultrapasa sira nia grande area to’o jogu premera parte termina eskor mantein 0-0 bá ekipa rua.
Kontinua bá segunda parte,trenador ekipa Kampiaun Karketu Dili Fc Vicente Ramos halo mudansa jogu hodi hasai deveza Pedro Vicente hatama Avansadu Gaudensio Monteiro.
Maibé mudansa hirak ne’e seidauk lori sorte bá Karketu Dili Fc tanba Emmanuel Fc nafatin Domina bola.
Iha menutu balun jogador Emmanuel Fc ho númeru kamizola 9 Alexandre Moreira hetan kartaun kinur bá dala rua halo Arbitu duni sai husi Kampu laran tanba komete Euru kontra Paulo Galy.
Hela jogador nain 10, oportunidade bá Karketu Dili hodi sobu liña deveza Emmanuel Fc maibé Emmanuel Fc mantein ho ritmu jogu.
Menutu 73 jogador nain 10 husi Emmanuel Fc esforsu makas,ikus mai jogador númeru 10 Edit Savio Doko rede Karketu Dili Fc Georgino da Silva,hafoin simu bola husi nia kompaneru Joao de Sousa hodi hatur eskor 1-0 to’o jogu termina.
Resultadu ne’e lori Emmanue Fc Rekoila vitória dala ida,derota ida no hetan ona pontos 3, enkuantu Karketu Dili Fc hela ho Pontos 0,hafoin hetan Derota dala rua tui-tuir malu.
Tabela Klasifikasaun Liga Timorense Divizaun 1 2022/2023
About Post Author
