Dili-Treinadór Kablaki Fc João Fernandes rekoñese, fallansu husi jogadór foun no menus preparasaun, obrigadu nia ekipa tenki lakon pontu 3 bainhira kontra nia ekipa adversáriu Santa Cruz Fc ho skor 1-3 iha jogu jornada dahuluk Liga Futeból Timor Leste (LFTL) segunda divizaun nian ba tinan 2021.
Treinadór hateten, derota ne’e tanba nia ekipa ladun halo preparasaun di’ak, tanba lista jogadór submete ba órgaun LFTL tarde, nune’e halo treinamentu ba jogadór sira iha semana ida de’it.
“Ohin ne’e ami falla liu iha harmonizasaun, tanba entre liña ho liña la koñese didi’ak malu nia jogu, tanba jogadór sira kuaze foun hotu no falla mós iha mentalidade, no físiku”. Hateten treeinadór ne’e iha Stadium Munisipal Dili, Kuarta (13/10).
Nia mós afirma, razaun ne’ebé simu derota ne’e mós tanba data ne’ebé LFTL fó ba sira limitadu, nune’e defísil ba sira atu buka jogadór di’ak hodi haforsa sira ekipa.
Klubu mós fó informasaun ba ami mós tarde atu halo treinamentu ba jogadór sira. Ami ohin ne’e joga ladi’ak duni, tanba jogadór sira hakarak atu tik-tak mós lasai, no atu halo bola aas mós lasai. Dehan nia.
Iha fatin hanesan treinadór Santa Crus FC João Campos apresia ho nia jogadór sira tanba hatudu sira nia performe ne’ebé di’ak, hodi konsege rekolla pontu 3 husi ekipa adversáriu.
Nia promete, ba oin sira sei halo preparasaun ida di’ak liu, nune’e bele hasoru ekipa seluk iha jogu jornada daruak nian. (Vidal).
About Post Author
