Dili – Federasaun Futeból Timor Leste (FFTL), sei akumula ekipa juvinil Sub-17 husi munisipiu 12 inklui RAEOA, ne’ebé sai kampeonatu iha kompetisaun jogu futeból munisipiu nian ba tinan 2020, sei tuir kompetisaun nasionál iha tinan ne’e nia laran.
Objetivu realiza kompetisaun nasional Sub-17 ne’e, atu buka fini jogadór di’ak ba futuru, nune’e mós fó oportunidade ba klubu sira atu bele hili jogadór sira ne’ebé ho prestasaun di’ak hodi haforsa sira nia ekipa.
Tuir Sekretáriu jerál Federasaun Futeból Timor-Leste (FFTL) Nelio Isác Sarmento hateten, ekipa sira ne’e asosisaun futebol munisipiu mak sei halo selesaun hodi representa nia munisipiu atu tuir kompetisaun nasionál ba tinan ne’e.
“Kompetisaun ba sub-17 iha munisipiu sira ne’e, asosiasaun futeból sira sei halo selesaun ba klubu ne’ebé sai kampeonatu hodi representa munisipiu atu mai jogu iha nasionais nian”. Sekretáriu jerál ne’e informa iha nia knaár fatin FFTL, Kuarta (13/01/2021).
Nelio esplika, intensaun husi kompetisaun ne’e atu hare fila fali prestasaun treinadór sira nian, ne’ebé mak durante ne’e tuir ona formasaun iha nivel C hodi ba treinu jogadór sira iha klubu munisipiu nian, hetan duni rejultadu di’ak kalae.
“Fó mós oportunidade ba klubu sira atu hare labarik sira ne’ebé iha prestasaun di’ak, bele bolu ba haforsa sira nia klubu”.
Aleim ne’e mós hakarak hili jogadór sira ne’ebé joga di’ak, nune’e bele haforsa tan selesaun nasionál sub-17, bainhira atu partisipa iha Liga Champion ASEAN ninian ba tinan 2021.
Tanba jogu sub-17 ne’e bainhira ita kompete iha ASEAN Chamionship mak manan, automatikamente sei ba joga iha AFC, tanba ida ne’e mak ita prepara hahú kedas iha tinan kotuk.
Nune’e mós nia relata, planu FFTL ba tinan ne’e sei hasa’e tan kompetisaun jogu liga feto nian, husi segundu divizaun ba primeiru divizaun.
“Tinan ne’e sei iha kompetisaun ba jogu kopa ba Mane no Feto, nune’e mós kompetisaun ba Sub-17”. (Vidal).
About Post Author
