Ekipa segundu divizaun Santa Cruz FC halo hela negosiasaun ho jogador estranjeiru nain 3 husi Indonezia hodi haforsa Santa Cruz ba jogu Play Off ne’ebé mak sei hala’o iha loron 11 fulan Marsu tinan 2021.
Diritour Tekniku Santa Cruz FC João Campus hatete, Santa Cruz prepara ona jogador hamutuk nain 23 atu ba kompete iha jogu Play Off ne’ebé mak sei hala’o iha fulan Marsu, tuir kalendariu ne’ebé mak fo sai ona husi Liga Futebol Timor-Leste (LFTL).
“Tarzetu Santa Cruz nian hodi rekruta jogador estranjeiru na’in 3 husi Indonezia, hakarak atu hadau tikete husi jogu Play Off ba primeiru divizaun tinan ne’e, relata João Campus ba Jornalista Desportu.XYZ iha Sede FFTL, Kinta (24/02).
Nia informa jogador na’in 3 husi Indonezia sei haforsa Santa Cruz iha lina avansadu, mediu no defeza, tanba ekipa Santa Cruz durante ne’e menus hela liña avansadu.
La’os deit jogador estranjeiru, maibe Santa Cruz mos iha jogador foun João Paulo husi ekipa Lica-Lica no jogador Nelson husi Ponta Leste ne’ebé mak kontratu remata ona, sira hakarak mai haforsa fali Santa Cruz, tenik nia.
João dehan iha semana ida ne’e ekipa Santa Cruz sei lori lista jogador hamutuk 23, inklui jogador estranjeiru nain 3 ne’e atu ba hatama iha LFTL.
“Maibe sei iha posibilidade ba jogador nain 3 ne’e atu mai ka lae, tanba moras COVID19 halo ita nia nasaun aplika hela Estadu Emerjensi no Aeroportu mos taka”. (Eug).
About Post Author
