Jogador ho pozisaun mediu husi ekipa FC Buibere Nilda Romana Carvalho hatete, sei mantein nafatin performa hanesan uluk hodi lori Buibere manan tan Liga Feto tinan 2021.
Eis estudante Colegio Paulo VI ne’e katak, ekipa FC Buibere nia preparasaun durante ne’e la’o diak tebes, maibe iha jogador balun treinu hela iha selesaun nasional, halo ami la konsege treinu hamutuk.
“Maske la treinu hamutuk, hau sei mantein nafatin performa hanesan uluk hodi lori FC Buibere konkista tan Liga Feto epoka tinan 2021” afirma Nilda ba jornalista Desportu.XYZ iha Kampu Demokrasia, Kuarta (23/02).
Nia hatutan atu garantia Buibere kampiaun tinan ne’e sei senti todan oituan, maibe hau sei la baruk atu treinu no esforsu makas hodi hatudu performa hau nia labele monu iha epoka ida ne’e.
Durante hamutuk ho ekipa Buibere hahu husi 2019 to mai 2020, hau senti orgullu tebes, tanba Buibere hanesan ekipa ne’ebé mak promove talentu hau nian hanesan futebolista no aprende buat barak iha klubu refere.
Feto ho idade 21 ne’e dehan, wainhira klubu seluk atu kontratu hau, posiblidade diak atu hili dalan ba hodi hetan esperensia foun ruma husi klubu seluk.
Fo hanoin katak, ekipa FC Buibere hari iha tinan 2019 no tinan 2020 konsege sai kampiaun dala rua tuir-tuir malu iha Liga Feto no Taca de Rosa Mukit Bonaparte.
Tuir planu kalendariu jogu Liga Feto tinan 2021 sei hala’o iha fulan Marsu nia laran, no klubu ne’ebé mak partisipa iha primeiru divizaun hanesan, FC Buibere, AD SLB Laulara, Maranatha, S’Amuser, Akademika, ekipa segundu divizaun: VDL, Baucau, FC Nain Feto, FC São Jose, Maudoko, UNITAL. (Eug)
About Post Author
