DILI-Ekipa futeból feto FC Akadémika antes ne’e deklara katak sei halo esforsu iha jornada datoluk ne’e basá sei kontra ekipa jigante SLB Laulara.
Akadémika oras ne’e tuur iha terseiru lugar no iha jogu aban sei kontra SLB laulara ne’ebé okupa segundu lugar Jornada daruak Liga feto 2020.
Iha Sábadu (18/07) semana kotuk, Ekipa Futeból feto akadémika FC ho susesu rekolla tan pontu tolu iha jornada daruak Liga Futeból Feto Timor-Leste 2020, hafoin ho susesu manan 7-0 ba ekipa feto Maudoko-FC.
“Ami nia esforsu sei la too iha ne’e de’it ami sei esforsu aan iha jogu sira tuir mai,” afirma kapitaun akadémika FC ba jornalista sira hafoin jogu remata iha kampu futeból FFTL.
Bria hatete, jogu refere hatudu rezultadu di’ak, mezmu primeira parte hamosu ona golu 4-0, akadémika nafatin esforsu prodús golu.
Nia realsa, vitória ne’ebé Akadémika hetan bazeia ba jogu ho sistema no ikus mai hatudu rezultadu diak. “Ekipa adversáriu moos makaas,” deklara kapitaun akadémika ne’e hodi rekoñese forsa hosi ekipa Maudoko-FC.
Mezmu foin rekolla pontu tolu maibé Akadémika la tuur hakmatek basa jogu sira iha tempu tuir mai sei hasoru ekipa jigante iha liga futeból feto timor leste tinan 2020 ne’e.
“Ami bele dehan hasoru ekipa ne’ebé makas uitoan,” deklara kapitaun nee hodi haree jogu iha futuru mai, ho fiar aan nia nafatin afirma prinsípiu ekipa nian maka vitória maibé buat hotu sei hatudu hosi rezultadu jogu.
Aban loraik mós jogu boot entre Buibere hasoru Maranatha, ekipa rua sei hatudu jogu ne’ebé nakonu ho emosaun basá iha Maranatha iha jogadór internasionál na’in tolu, enkuantu ekipa Buibere mai hosi ekipa jogadór senior ne’ebé nakonu ho esperiénsia. Oras ne’e ekipa buibere lidera klasifikasaun iha jornada daruak nian, enkuantu ekipa Maranatha okupa pozisaun dalima iha tabela klasifikasaun tanba sofre derrota dala ida.(ato)
About Post Author
