DILI – Ekipa Nain Feto tenki hakruk ho derota 0-4 kontra nia adversariu Maudoko fc iha jogu kontinuasaun segundu divizaun jornada daruak Liga Timorense de Fútebol Femenino (LTFF) ne’ebé mak halao iha Kampu Demokrasia Domingu (19/09).
Jogu hahu ekipa rua mai ho ida-idak nia mehi hakarak rekolla pontos iha jogu refere, maibé Maudoko FC tun halo jogu ho presasaun maka’as hodi la fo biban ba Nain Feto atu hetan bola.
Iha minutu 31 sorte a’at akontese ba Nain Feto, tanbá guarda rede Adelia Guteres tenki hetan golu ida husi jogador Leticia Claudia hodi hatur skor ba 1-0.
Ho golu ne’e halo Maudoko fc fiar a’an liu tan hodi halo jogu tensi a’as difesil ba Nain Feto atu hetan bola hodi ultrapasa ba area defensivu Maudoko nian.
Ekipa Maudoko hetan premiu penalidade ida husi arbitu, hafoin defeza Nain Feto komete erru ba jogador Maudoko iha area penalidade laran kapitaun Maudoko Emilia Gomes hakat hanesan ezekutador falla marka golu tanbá bola a’as liu besi rin hodi taka jogu primeira parte no skor 1-0 nafatin ba Maudoko iha primeira parte.
Hakat ba segundu parte, ekipa Nain Feto tenta halo mundansa jogu hodi buka opurtunidade atu responde golu, maibé defeza Maudoko fc la fo fatin ba Nain Feto atu tama ba sira nia area.
Sorte a’at kontinua akontese, wainhira defeza Nain Feto komete hand ball iha lina penalidade laran halo arbitu foti ba Maudoko hodi suta penalidade, maibé jogador Leonia Soares falla marka golu tanbá hetan salva husi guarda Nain Feto Adelia Guteres.
Minutu 53 Leonia Soares lori Maudoko fc halis rede Nain Feto hodi hasai eskor ba 2-0 halo Nain Feto difesil liu tan atu tama liu Maudoko sira nia area.
Ekipa Nain Feto hetan suta livre dala tolu, maibé bola rua mak kona nia tarzetu no ida halais ses liu deit besi rin.
Iha ne’ebé Maudoko fc fila doko rede Nain Feto dala rua tui-tuir malu liu husi Jogador Carlota da Costa iha minutu 66 no Leticia Claudia minutu 72 to jogu remata.
Rezultadu ne’e lori Maudoko fc rekolla ona pontos tolu husi jogu dala rua, derota ida no vitoria ida, enkuantu Nain Feto ho pontos 0 husi jogu dala rua.
About Post Author
