DILI – Ekipa femenina VDL manan Maudoko fc ho skor 2-0 iha jogu abertura segundu divizaun Liga Timorense de Futebol Feminino (LTFF) tinan 2021 ne’ebé mak halo iha estadiun Municipal Dili Kinta (19/08).
Jogu primeira parte ekipa rua mai ho hanoin hanesan hodi hakarak hadau pontos maximu husi jogu ne’e, maibé ekipa VDL tun ho tatika jogu diak liu hodi halo Maudoko fc tenki esforsu makas atu hetan bola husi sira nia ain.
Ho domina bola husi VDL jogador ho numeru kamizola 7 Natacia Boavida ne’ebé mak hatudu nia tatika jogu halo lina defeza Maudoko fc tenki hasai serbisu makas hodi salva sira nia rede.
Minutu 42 defeza VDL ho numeru jersey 10 hetan bola kona besi rin hodi monu ba jogador nia liman, ikus mai arbitru foti desizaun hodi hakat ba suta penalidade.
Jogador Natacia Boavida hanesan ezekutador ba penalidade sosesu fura rede Maudoko, hatur kedas skor ba 1-0 hodi taka jogu primeira parte.
Kontinua ba segunda parte ekipa Maudoko fc mai ho nakfilak jogu ho bola aas, maibé VDL fc koko hodi hamate ho bola badak liu husi ain ba ain halo Maudoko fc atu ultrapasa ba lina oin VDL fc susar tebes.
Iha ameasa balun husi Maudoko fc ba rede VDL liu husi suta livre no kantu, maibé gurada rede VDL solidu liu hodi satan bola ne’ebé mak atu tama ba rede.
Iha ne’ebé jogu ladura kleur VDL fc fila halis rede Maudoko fc nian iha minutu 46 liu husi jogador numeru kamizola 27 Lucia Ximenis hodi hatur eskor ba 2-0.
Ho golu ne’e halo Maudoko fc difisil liu tan hodi fo ameasa ba rede VDL, tanbá lina defeza kotuk la fo fatin atu tama sira lina oin to jogu remata.
Ekipa Femenina VDL FC 
Ekipa Femenina Maudoko FC 
VDL FC vs Maudoko FC iha Jogu abertura LTFF 2021
About Post Author
