DILI- Federasaun Futeból Timor-Leste anunsia ona iha sira nia portal deside ona montante prémiu ba liga futeból feto Timor-Leste edisaun daruak nian iha tinan 2021 ne’e ho prémiu aas liu maka $10.000.
“Torneiu LTFF partisipa husi klube primeira no segunda divizaun hamutuk klubu 11. Klube primeira divizaun sei hadau malu kampiaun ho prémiu $10.000,00, no troféu. Iha mós performance bonus ho valor $1000,00 ba klubu premeira divizaun ne’ebé manan jogu,” sita FFTL iha portal rede sosial (19/08).
Prémiu adisionál hanesan melhor jogador sei hetan premiu $1000,00, Top Score melhor marcador sei hetan premiu $1000,00, no Best Goal Keeper [Melhor Golheiro] sei hetan premiu $1000.00.
Jogu ba premeira divizaun fahe ba jornada sanulu ho total jogu hamutuk 20, ne’ebé joga husi klubu lima hanesan; FC Buibere, AD.SLB Laulara, Maranatha FC no Academia FC.
Kampiaun ba segunda divizaun hetan premiu $3000,00 no troféu. Jogu ba segunda divizaun fahe ba jornada lima ho total jogu hamutuk 15. Performance bonus ba segunda divizaun sei hetan $500,00. Segunda divizaun konsiste husi klubu neen, mak hanesan; VDL FC, UNITAL FC, Nain-Feto FC, São Jose FC, ASS. BAUCAU FC, no Maudoko FC.
Klube premeira no segunda divizaun mós hetan suporta finanseiru husi FFTL ho montante ne’ebé diferente. Kada klube husi premeira divizaun hetan $2500,00, no kada klube husi segunda divizaun hetan $1500,00.(AS).
About Post Author
