Dili – Ponta Leste FC hanesan ekipa dahuluk iha grupu B, ne’ebé remata ona nia jogu ikus ho Nagardjo FC hodi hetan pontu 12 iha Copa FFTL tinan ne’e.
Jogu entre ekipa adversáriu Nagardjo iha kampu futeból stadium Munísipal Dili (23/09), Ponta Leste halakon ekipa adversáriu ho skor 1-0.
Tuir treinadór Ponta Leste Eduardo Pereira katak, Ponta Leste lakon no manan mós hakat ba oitavu finais.
“Hanesan treinadór hakarak mellora di’ak liu tan jogadór sira, atu prepara jogu ho di’ak liu tan iha oitavu finais”. Hateten treinadór ne’e iha fatin konferénsia imprensa stadium Munísipal Dili-Kuarta (23/09/2020).
Ekipa Ponta Leste, maske manan ekipa adversáriu, maibé, treinadór ne’e mós rekoñese, iha jogu primeira parte sira defísil produs golu, tanba Nagardjo mós hatudu jogu di’ak tebes, maibé depois hakat ba jogu segundu parte, foin sira muda estratéjia jogu, nune’e hodi produs duni golu iha minutu ikus ’90+1’, extra (5 minutus) nian, hodi hetan rejultadu 1-0, to’o jogu remata.
Treinadór ne’e mós apresia ho ekipa adversáriu Nagardjo, tanba nia jogadór sira hatudu jogu di’ak tebes.
“Jogadór Nagardjo joga di’ak tebes, maske sira la hakat ba oitavu finais, maibé ba futuru sira sei joga di’ak liu tan”. Nia dehan.
Ponta Leste ekipa ne’ebé nunka lakon iha sira nia grupu B, kompostu husi AS Marca, Fitun Estudante FC, Nagardjo FC no Atlétiku Ultramar FC. (Vidal).
About Post Author
