Dili- Vitória ba Nagardjo Fc hafoin susesu rekolla hikas pontu 3 liu husi nia adversáriu Santa Cruz Fc ho skor 5-1 iha jogu jornada datoluk grupu B, Liga Futeból Timor Leste (LFTL)
Jogu entre ekipa rua iha Stadium Munisipal Dili, Sexta (30/10) oras 04;00 tl lokraik, hafoin árbitru Romario Teti hú árbitu lian, ekipa rua tun ho tátiku no ritmu jogu hanesan, tanba bola husi ain ba ain.
Maske nune’e, Nagardjo Fc fó ameasa uluk ba Santa Cruz nia guarda rede, liu husi jogadór Chiquito do Carmo, bainhira simu bola asisténsia husi nia komapañeru Fortunato Ximenis.
Hafoin iha minutu 10 Nagardjo Fc fura kedas rede Santa Cruz nian, tanba Nelson dos Reis halo monu jogadór advesáriu Chiquito do Carmo iha liña 16 nia laran.
Nune’e, árbitro Romario Teti foti desizaun hodi hakat ba penalidade, tanba ne’e ezekutadór Bendito Ximenis aproveita produz golu no lori nia ekipa hatur ho skor 1-0.
Golu refere halo Santa Cruz Fc tenki esforsu-an, tenta atu lori bola ultrapasa defeza Nagardjo nian, maibé defeza Nagardjo la fó fatin atu sira liu.
Ekipa rua nafatin tenta halo kontra atake ba malu, maibé la hatudu rejultadu golu ruma, tanba defeza ida-idak nian mantein disiplina do jogu husi liña ba liña.
Hafoin iha minutu 33 treinadór Santa Cruz Fc João Feleciano tenki hasai nia jogadór liña mediu Alberto Fernandes hodi hatama Deonidio Maia atu haforsa sira nia liña klaran, nune’e Danilo Alves halo ameasa kedas ba rede Nagardjo nian.
Tama ba minutu 39 Nagardjo responde tan golu daruak liu husi Bendito Ximenis bainhira simu bola asisténsia husi Julião Ximenis.
Golu ne’e la dura kleur liu, tanba iha minutu 41 Nagardjo responde tan golu datoluk hodi muda skor ba 3-0 liu husi jogadór Ricardo Perreira bainhira aproveita bola barullu iha baliza oin.
Santa Cruz atu sai husi nakukun ne’ebé sira simu, tenki esforsu hodi halo kontra atake no fó mós ameasa ba rede Nagardjo nian.
Jogu entre ekipa rua kontinua manas liu tan, tanba jogadór Santa Cruz nian, Liborio Geronimo ho Chiquito do Carmo tenki haksesuk malu, tanba ida tebe kona ida nian.
Maibé parte árbitro hakalma hikas situasaun ne’e, hafoin jogu kontinua lao normál.
Tanba ne’e to’o jogu primeira parte termina, Nagardjo Fc lidera skor 3-0.
Hafoin iha jogu segunda parte hahú, ekipa rua nafatin halo kontra atake ba malu, maibé la iha ida mak atu produs golu ruma tanba situasaun udan, nune’e jogadór sira labele pasa bola malu.
Udan ne’e lori presente furak ida ba Santa Cruz hodi responde hikas golu ida liu husi bola penalidade, ne’ebé ezekuta husi João de Souza hodi muda skor 1-3.
Golu refere halo jogadór Santa Cruz nian, hahú hatudu sira nia ritmu jogu hodi kontra atake maka’as no kontinua halo ameasa, maibé lalori rejultadu di’ak, tanba defeza Nagardjo nian, mantein sira nia liña disiplina jogu.
Sorte di’ak nafatin monu ba Nagardjo Fc hodi responde hikas golu dahaat iha minute 59 liu husi jogadór Julião Ximenis, bainhira aproveita bola iha baliza oin, ne’ebé defeza Santa Cruz nian pasa bola labele liu ba baliza.
Golu ne’e halo treinadór Santa Cruz João Feleciano tenki aumenta tan nia liña mediu hodi dada sai, Julinho da Costa no hatama suplentu Januario Cabral.
No troka mós parte defeza Danilo Alves ne’ebé subtitui husi Jacinto da Silva atu haforsa tan sira nia ekipa.
Maske Santa Crus halo subtituisaun ba nia jogadór, maibé Nagardjo Fc, nafatin tenta kontra atake hodi halo ameasa, maibé la hatudu rejultadu golu.
Mehi at monu ba jogadór liña defeza Elroy Braz, tanba iha minutu 83 halo auto golu rasik ba nia ekipa hodi hatu skor ba Nagardjo 5-1.
Atu asegura rejultadu Nagardjo Fc nian, treinadór Miguel Soares tenki hatun tan nia jogadór, Mario Neves no hasai Bovio Soares nune’e mós hasai Marco Gusmão no hatama Juninho Sanches.
Santa Cruz nafatin halo subtituisaun ba nia jogadór hanesan Elroy Bras no hatama Denilson Santos, signifika atu iha mudansa rejultadu ruma husi sira ekipa, maibé rejultadu nafatin tristeza ba sira.
Taba to’o jogu segunda parte termina vitória ba Nagardjo Fc ukun ho skor 5-1. (Vidal)
About Post Author
