DILI – Oragaun Liga Fútebol Timor Leste (LFTL) halo mudansa orariu ba ekipa Ad SLB kontra DIT FC ne’ebé tuir lolos hala’o jogu iha loron 13 fulan Novembru, maibé LFTL tenki muda fali orariu ekipa rua nian ba iha jornada da tolu, tanbá jogador Ad SLB nain 13 haforsa hela selesaun nasional Timor Leste iha Suzuki Cup no AFC cup U-23 iha Singapura.
Diretor Verifikasaun lisensiamentu klubu LFTL Jose Carvalho informa, ita hotu hatene katak klubu Ad SLB bele sai vitima iha prosesu jogu epoka tinan ida ne’e, tanbá sira nia jogador hamutuk nain 13 ba reprezenta Timor Leste iha jogu Suzuki cup no AFC Cup U-23 iha Singapura.
“Ho razaun sira ne’e klubu rua konkorda malu ona atu muda orariu jogu, tanbá ne’e LFTL la’os halo mundansa orariu total, maibé muda orariu segundu jogu iha loron sabadu dia 13 entre Ad SLB kontra DIT Fc sei muda fali ba dia 23 de Novembru iha jornada da-toluk” afirma Jose Carvalho ba jornalista iha Xanana Sport Center, Kinta (11/11).
Nia haktuir, jogador ne’ebé mak klubu Ad SLB mai rejistu iha LFTL hamutuk 27, maibé jogador nain 13 ba tia liur no iha deit jogador 12 ne’ebé laos jogador prinsipal no sira foti fali jogador juvenil balun ne’e bele dehan fo impaktu ba ekipa.
Tuir regulamentu husi FIFA no AFC fo sai katak, ekipa ida ne’ebé mak nia jogador liu ha’at (4) ka lima (5) ida ba reprezenta selesaun, entaun orariu jogu ba ekipa rua tenki muda.
“Ita espera katak jogador Ad SLB nain 13 ne’e sei fila fali mai iha loron 16 fulan Novembro tinan ne’e atu labele fo inpaktu ba sira nia ekipa” dehan Jose.
Carvalho hatutan, jogu ida ekipa rua atu hasoru malu iha loron sabadu ne’e ita la hala’o ita muda fali ekipa rua ne’e ba jornada da tolu iha loron 23 hanesan jogu primeiru ba Ad SLB kontra DIT Fc , maibé jogu entre Lalenok United kontra Assalam Fc sei hala’o iha Domingu tuir nafatin kalendariu ne’ebé mak iha ona. (Eu).
About Post Author
