Dili – Órgaun Federasaun Futeból Timor-Leste (FFTL) sei mantein sira nia pozisaun atu nafatin fó subsidiu $ 20.000 ba klubu (8) husi premeru divizaun no $ 10.000 ba klubu (12) segundu divizaun, tanba subsidiu kada klubu sira ne’e deside antes ona husi órgaun ezekutivu federasaun nian.
Lia hirak ne’e hato’o husi Sekretáriu Jerál Federasaun Futeból Timor-Leste (FFTL), Nélio Issac Sarmento iha estadiun munisipal Dili, Kinta (19/2021).
Nia mós informa, bainhira federasaun mantein nia posizaun atu aloka subsidiu ba klubu sira hanesan antes hala’o ona, mak klubu sira deside atu la partisipa jogu mós, ne’e sira nia direitu. Tanba federasaun la’o tuir saida mak deside ona.
“Asuntu atu aumenta subsidiu ne’e, ami hato’o ona ba governu atu haree, ne’ebé iha semana oin sei iha reuniaun ida, ne’ebé hau hanoin federasaun sei iha opsaun seluk atu hato’o atu resolve”. Informa Nélio.
Nia dehan, kontinua la’o ho orsamentu ne’ebé atu apoiu ba klubu sira antes ne’e hodi normaliza tiha jogus sira iha époka tinan ne’e, atu aumenta ne’e hein ba planu orsamentu tinan oin mak bele ko’alia.
Federasaun iha responsabilidade atu fó subsidiu ba klubu sira ne’e, tenki mai husi dezisaun tree biliteral federasaun, governu no órgaun liga.
Governu ho federasaun iha konkordansia katak, orsamentu apoiu operasionais ne’e, governu mak tomakonta. Maibe subsidiu ba klubu ne’e, governu entrega mai federasaun mak responsabilidade.
Kona-ba subsidiu ba klubu ne’e, federasaun mak responsabilidade, maibé ita sei haree, tanba iha tinan rua nia laran ne’e ita la iha jogu, tanba iha hela situasaun covid-19, ne’ebé federasaun sei mantein nafatin, tanba iha kompremisu ida ho governu katak, klubu walu (8) iha primeira divizaun ho subsidiu $ 20.000 no klubu 12 husi segundu divizaun ho $ 10.000.
Federasaun iha konesimentu kona-ba ejizensia klubu sira nian. Ba orgaun liga no mós federasaun oinsa mak atu haree kona-ba klubu sira atu joga iha époka ida ne’e, maibé tenki aumenta subsidiu.
Baiza ba subsidiu sira ne’e, federasaun sei serbisu hamutuk ho órgaun liga oinsa atu atraka planu ida di’ak hodi halo abertura iha fulan agostu tinan ne’e.
Enkuantu orariu ba rejistrasaun jogu ba liga époka tinan ne’e limiti ona, tanba ne’e to’o agora iha klubu tolu de’it mak halo rejistrasaun, hanesan Lalenok Fc, Assalam Fc no Lika-Lika.
“Iha klubu primeira divizaun ida no Segundu divizaun ida mak halo ona rejistrasaun, ne’ebé ita bele dehan jogu ba liga époka tinan ne’e, klubu tolu ne’e mak preparadu ona”. (desportu.xyz).
About Post Author
