Dili-Kompetisaun liga femenina ekipa primeira divizaun époka tinan ne’e, iha jogu loron daruak nian, Buibere Fc kontra nia advérsariu S’amuser Fc, obrigadu ekipa rua tenki fahe golu ba malu ho skor 1-1.
Tanba ne’e, tuir treinadór Buibere Fc Octavianos Pinto informa, tuir loloos sira rekolla vitória kontra nia ekipa adversáriu, maibé tanba nia jogadór balun halo fallansu, nune’e ekipa adversáriu sira konsege hatama golu iha jogu segundu parte hodi muda ba 1-1.
“Ema hatama golu ne’e, tanba orienasaun ne’ebé hau fó sira la halo tuir, sira joga tabele liu iha ema nia kotuk, ita haree ami nia liña klaran, tabele fali iha defeza, halo liña klaran mamuk, nune’e hodi halo ema tama beibeik”. Hateten treinadór ne’e, hafoin remata jogu iha Stadiun Munisipal Dili, Sabadu (21/2021).
Nia mós promete, fallansu hirak ne’e, nia parte sei hadi’a, nune’e iha jogu tuir bele iha mudansa.
Nune’e mós treinadór ‘Samuser’ Fc, Olizio dos Santos Sarmento hateten, iha jogu primeira parte nia ekipa hetan fallansu hodi derota ho skor 0-1.
Maske nune’e, iha segundu parte, nia halo mudansa iha jogu balun, no kontinua fó orientasaun ba jogadór sira atu halo liña kordenasaun ba malu, no hamate ema nia jogu iha liña balun.
Ho nia estratejia ne’e, nia jogadores sira konsege hatudu rejultadu oin seluk ba nia ekipa, iha jogu segundu parte, ne’ebé muda ho skor 1-1, to’o jogu termina.
Tan ne’e, nia parte agradese tebes ba nia jogadór sira tanba to’o jogu termina sira konsege halo duni impata ho ekipa adversáriu.
Treinadór ne’e mós rekoñese, sira mós hetan falhansu balun iha jogu ne’e rasik, tanba nia jogadór ida hetan aleiza hodi la partisipa jogu, nune’e mós jogadores balun joga ho resisténsia tun tebes.
Nia promete, fallansu ne’ebé iha sei hadi’a, hodi hasoru Academica FC, iha jogu tuir mai. (Desportu.xyz).
About Post Author
