Gleno – Úniku golu iha jogu oitavu finais entre Boavista FC Timor hasoru Karketu Dili muda istória ekipa Boavista hasoru ninia adversáriu ne’e tenba tinan naruk nuka hadau vitória.
Jogu entre ekipa rua, iha stadium munisipál Kafé Ermera, Sábadu (17/10/2020). Iha jogu primeira parte, ekipa Karketu mai ho ambisaun hakarak hatutan istória, maibé Boavista hakarak hapara istória.
Iha ne’ebé, Boavista hapara istória hodi doko rede Karketu iha minutu ‘3’ liu husi Francyatma Ima Kefi ho númeru kamizola 21.
Hafoin hetan asisténsia bola kruza husi nia kompañeru Edit Xavio.
Ho skor 1-0 halo ekipa rua hasai tan velosidade jogu, hodi halo kontra atake ba ekipa ida-ida nia rede.
Ekipa matak malirin, konsege muda tátika ho bola áas, Boavista responde ho bola ain ba ain, susar ba nia adversáriu, atu hetan bola.
Iha minutu balun, Boavista halo ameasa ba matak malirin, liu husi Kefi maibé guarda rede Frenky Cardoso salva bola husi nia ain.
Ho ameasa husi ekipa rua, la iha rejultadu di’ak, to’o jogu primeira parte termina, skor ba Boavista ukun ho 1-0.
Depois de hakat ba jogu segundu parte, Karketu halo mudansa jogu hodi subtitui jogadór, halo Boavista tenki hisik kosar atu salva sira nia rede.
Nune’e, iha minutu ’78’ treinadór Boavista tenki troka Edit Xavio, ne’ebe hetan subtituisaun husi Rivaldo Correia, hodi ajuda liña avansadu.
Ho subtituisaun refere halo Boavista defísil atu sobu liña defeza, ne’ebé mak komanda husi Jorge Sabas.
Tan ne’e, ekipa rua halo mudansa jogadór ba malu, maibé la iha rezultadu golu ruma, nune’e Boavista mantein lidera skor 1-0, to’o jogu segundu parte remata. (Vidal).
About Post Author
