Dili-Karketu Dili Fc ho naran estimadu Matak Malirin’ halo derota tan DIT Fc ho skor 1-0 hodi halo ekipa DIT falla atu hetan pontus iha jogu jornada dahat.
Tan ne’e DIT Fc hela nafatin ho pontus mamuk (0) iha tabela klasifikasaun ikus liu Liga Futeból Timor Leste (LFTL) ba primeira divizaun époka tinan ne’e.
Jogu entre ekipa rua iha jogu primeira parte, ekipa rua tun ho tátiku no ritmu jogu hanesan liu husi bola pasagem ain ba ain.
Maibé ekipa DIT Fc Nia jogadór Sewor Mahuse (9) lansa sutu ameasa dala ida ba rede Karketu nian bainhira defeza Karketu Dili nian halo monu Jose Almeida (7) besik area grande liña 16 nian.
Ekipa rua nafatin esforsu hodi kontra atake malu atu produs golu, maibé seidauk iha oportunidade di’ak atu hetan bola sutu livre.
Hafoin Karketu nia jogadór Angiso Barbosa (6) halo bola falta mão besik nia area grande defeza nian, maibé ezekutadór Sewor Mahusa (9) la aproveita bola hodi di’ak atu sutu ba rede Karketu nian laran.
Ekipa rua nafatin halo atake ba malu, maibé oportunidade barak ba ekipa DIT nia liña avansadu Jose Almeida (7) no Sewor Mahusa (9) atau produs golu, maibé la aproveita bola ho di’ak atu produz golu.
Tanba ne’e to’o jogu primeira parte deskansa ekipa rua mantein skor 0-0.
Hakat ba jogu segunda parte DIT nia jogadór avansadu sira falla dala rua tuituir malu atu hatama golu hodi halo sutu bola sai de’it husi rede leten.
Ameasa DIT Fc nian halo treinadór Karketu Dili Fc tenki troka nia jogadór liña avansadu Mickael Eugenio (88) iha minutu 50 no hatama Geovanio Albertu, no hasai mós Patrick da Silva (99) no hatama Silvestre Gama (21) iha minutu 53.
Subtituisaun jogadór Karketu Dili Fc nian atu halo mudansa ba sira nia jogu, tanba ekipa DIT nia jogadór halo presaun makas halo defeza Karketu nian tenki serbisu makas atu salva bola.
Hafoin Karketu Dili Fc kontra atake fila hodi produs golu iha minutu 69, liu husi jogadór Gaudencio Monteiro bainhira aproveita bola barullu iha rede oin DIT Fc nian hodi muda skor 1-0.
Skor refere halo DIT Fc kontinu halo subtituisaun ba nia jogadór sira atu halo mudansa jogu hodi halo impata, maibé la iha oportunidade di’ak atu sira liu defeza Karketu nian.
Nune’e to’o jogu segunda parte remata vitória ba Karketu Dili Fc ho skor 1-0 hodi okupa iha primeira klasifikasaun Liga Futeból Timor Leste ho pontus 10, manan dala (3) no impata dala ida (1) iha jogu dala haat.
Enkuantu ekipa DIT okupa iha pontus ikus liu, iha tabela klasifikasaun LFTL primeira divizaun épika tinan ne’e ho pontus mamuk (0).
About Post Author
