DILI – Klubu Karketu FC dada hikas jogador mediu Nataniel de Jesus ne’ebé mak klubu Lalenok United foin rekruta husi klubu Boavista Fc Timor iha fulan kotuk, maibé jogador refere nia kontratu sei termina iha loron 31 fulan Dezembro 2021.
Tanbá ne’e asistente treinador Lalenok United Gaspar Soares konsidera Karketu FC la konsulta ho klubu derepente jogador Natanel de Jesus asina ona kontratu.
“Ita koalia kona ba transferensia lolos ne’e Karketu tenki husu lai ba Lalenok jogador refere kontratu sei iha ka lae, maibé klubu rua ne’e seidauk koalia Natanel de Jesus asina uluk ona kontratu, baze legal saida mak jogador ne’e asina” relata Gaspar ba desportu.xyz iha SEJD foin lalais ne’e.
Nia dehan, informasaun ne’ebé mak hetan husi estrutura klubu Lalenok United nia katak, total jogador hamutuk 20 inklui Nataniel de Jesus nia naran rejistu ona iha LFTL, tanbá jogador hotu nia kontratu sei termina iha loron 31 fulan Dezembro tinan ne’e.
Hatan ba kestaun ne’e Sekretario Jeral Elizeu Isaac Veloso informa, klubu Karketu laiha problema ho Lalenok, tanbá konfuzaun ne’e jogador Natanel de Jesus ho klubu Lalenok.
Tanbá Karketu husu jogador refere dehan kontratu to’o deit fulan Outubro, tan ne’e mak Karketu hodi halo asina kontratu ba nia.
Entretantu ajuntu sekretariu Jeral Federasaun Fútebol Timor Leste (FFTL) Frederico Martins hateten, antes ne’e ami esplika ona ba klubu sira katak jogador ne’ebé mak ita fo kontratu ne’e husi inisiu to remata jogador tenki simu salariu to’o nia kontratu termina tuir regulamentu FIFA nian.
Maibé natureza iha kontratu ne’ebé mak jogador selebra ho klubu sira maioria mensiona iha neba katak kuandu kompetisaun hahu mak salariu foin ativu.
Iha fatin hanesan diretor verifikasaun lisensa Liga Fútebol Timor Leste (LFTL) Jose Carvalho hatutan, wainhira klubu ida kontratu jogador ida klubu sira mos tenki iha dever, tanbá jogador hala’o ona nia dever, se karik mak klubu ida liu fulan ha’at (4) mak nia kontratu lao hela ho jogador sira mak klubu la selu tuir regulamentu FIFA nian katak kontratu ne’e la vale.
About Post Author
