DILI – Ekipa S’Amuser okupa terseiru lugar iha Taça Rosa ‘Muki’ Bonaparte 2020 hafoin hatun nia adversariu Maranatha ho eskor 4-1 iha Estadiun Munisipal Dili Sabadu (19/12).
Jogu hahú ekipa rua tun ho ambisaun boot hakarak rekolla pontu masimu hodi okupa iha terseiru lugar iha Taça Rosa Mukit Bonaparte tinan ne’e.
Iha ne’ebé ekipa S’Amuser konsege halis ona rede Maranatha iha minutu 1 hafoin jogador Dolores da Silva ho numeru kamizola (7) simu bola kruza husi Nilvia Marcal parte eskerda halo guarda rede Nidia da Costa la bele salva bola husi nia ain, hodi hatur eskor ba 1-0.
Hakfodak ho golu lais husi S’Amuser halo Maranatha tenki halo mundansa jogu hodi hatama mellor markador iha Liga Feto Deonizia Barretu hodi haforsa liña avansadu.
Ho mundansa ne’e ikus mai Maranatha hetan bonus penalidade hafoin jogador S’Amuser komete Hand Ball iha risku mutin laran halo arbitru desidi ba penalidade, Deonizia Barretu ho numeru (17) hanesan ezekutador suseu halo impata score ba 1-1 iha menutu 36.
Score sai 1-1 halo ekipa rua hala’o jogu iha anin leten hodi halo adeptos ekipa rua hakilar maka’as liu tan hasai jogador sira nia espiritu komesa nakloke ba malu.
Maibé atu taka primeira parte ekipa S’Amuser hekis tan rede Maranatha iha minutu 43 ho golu individual Dolores da Silva hodi hatur score ba 2-1.
Parte daruak Maranatha tenki lakon avansadu Deonizio Barretu tanba hetan aleija iha ain los halo jogador tenki troka husi Silvia Soares difesil ba Maranatha atu sobu liña defeza S’Amuser.
Iha minutu 70 Leticia Soares numeru kamizola (8) lansa suta distansia dok ho ain los halo guarda rede Marantha Nidia da Costa hamrik hodi hateke deit bola, ikus mai eskor sai ba 3-1.
Ekipa Maranatha ne’ebé mak okupa iha segundu pozisaun Liga Feto Timor Leste uza tatika ho bola as atu sobu liña defeza S’Amuser maibé defisil atu sobu.
Termina jogu Dolores da Silva halo kompleta nia hat-trick alias golu tolu iha minutu 85 liu hosi golu penalidade hodi taka jogu vitoria ba S’Asmuser ho Score 4-1. Parabéns Ekipa S’Amuser! (Eug).
About Post Author
