(Desportu.XYZ) – Ekipa Coração Fc (Ultramar) provizoriumente lidera primeira tabela klasifikasaun ho pontu 4, iha Liga Timorense 2022-2023, hafoin halo impata ho nia adversáriu AD-SLB Laulara ho skor 1-1, Kuarta (22/02) ne’e iha stadium Munsipal Dili.
Iha jogu primeira parte hahú, ekipa rua tun ho jogu ne’ebé kompetitivu tebes, tanba ekipa ida-idak hatudu nia ambisaun hakarak lidera uluk golu, maibé liña defeza ekipa mantein sira nia disiplina jogu atu salva sira nia ekipa atu labele sofre golu.
Hafoin iha minutu balun, ekipa Coração FC (Ultramar), tenta tama area grande AD-SLB nian, maibé liña defeza AD-SLB nian unido tebes hodi kontrola nia adversáriu atu labele ultrapasa bola liu ba kuarda rede.
AD-SLB Laulara, hanesan ekipa ne’ebé mai ho nia jogador maioria ho esperiensia aas, tanba jogador barak mak ba joga ona iha nasaun liur, hodi halo jogu passa bola husi ain ba ain, no tenta kontra, maibé defesa Ultramar nian mantein liña metin.
Hafoin iha minutu balun, Corração Fc nia liña defeza, falla kontrola bola ho di’ak hodi halo bola falta ba jogador AD-SLB nian, João Frit (6), ne’ebé monu besik liña (16), nune’e arbitru Romário Teti, foti desizaun hakat ba suta ba bola falta, ne’ebé ezekuta husi jogador Mozinho de Lima (10) hodi halo quadra rede Corração Fc nian, Francisco Gusmão tenki baku sai bola husi baliza laran.
Jogu ekipa rua manas liu tan, hodi halo adeptu ida-idak haklalak hodi fó apoiu sira nia ekipa atu bele hetan vitória.
Entretantu, ekipa Corração Fc nafatin tenta husi liña ba liña atu muda skor, maibé SLB nia liña defeza nafatin metin.
SLB mós hatudu sira nia ritmu jogu hodi fo ameasa ba nia adversáriu liu husi Zenivio Mota (7) ne’ebé simu bola assistensia husi Cornelis Portela (11).
Enkuantu Corração Fc mós tenta kontra atake maibé lá iha oportunidade ba sira atu produs golu ruma.
Hafoin iha minutu 35 sorte di’ak monu ba AD-SLB hodi muda skor 1-0, liu husi jogador Bakayoka Ozi (2), liu husi bola barullu iha kuarda rede Ultramar nian.
Ekipa Corração, tenta hakarak muda skor refere liu husi bola kanto dala rua tuituir malu, maibé la aproveita ho di’ak atu produs golu ruma.
Tanba ne’e to’o jogu primeira parte deskansa AD-SLB lidera 1-0 ba Corração Fc.
Hakat ba segundu parte, liu de’it minutu balun, ekipa AD SLB lansa kedas ameasa, liu husi jogador Bakayoka Ozi (2).
Nune’e mós Ultramar hatudu sira jogu hodi lansa bola dook, maibé salva husi baliza AD-SLB Filonito Nogueiro (12). Nune’e mós oportunidade nafatin monu ba Ultramar, liu husi bola falta, maibé ezekutador Yohanes Gusmão (12) suta la kona iha alvu ruma.
Ekipa rua halo atake ba malu, hafoin ekipa Ultramar nia jogador Miguel Barbola (19) lori bola husi lina klaran tama to’o area defesa SLB nian, nune’e defeza Filipe Oliveira (24) halo monu Miguel iha liña defeza, nune’e arbitru foti ba penalidade, ne’ebe ezekuta husi Carlos Ximenes (16) hodi muda skor hanesan ba 1-1.
Jogu rua…rame liu tan, tanba ekipa rua halo atake malu makas atu muda skor, maibé la iha oportunidade di’ak atu ezekuta bola.
Atu lidera iha jogu ne’e, ekipa rua hahú troka sira nia jogador, maibé la iha sorte tanba ida-idak mantein sira nia liña metin hodi mantein skor 1-1 to’o jogu segundu parte termina.
Treinadó AD-SLB, Julião Monteiro relata, maske lidera golu iha jogu primeira parte, maibé sei falla iha finalizasaun jogu.
“Ami foin hetan jogu di’ak iha Segundu parte, tanba ne’e ba oin ami sei hadia buat balun”. Dehan treinador ne’e.
Iha parte seluk treinador Corração Fc, Siquito do Carmo hateten, sira nafatin apresia ho impata entre ekipa rua tanba iha jogu ba daruka manan ida no impata ida. Tanba ne’e ekipa Corração Fc provisória okupa ita tabela klasifikasaun liga Timorense 2022-2023 ho pontu 4.
About Post Author
 - Ekipa Coração Fc (Ultramar) provizoriumente lidera primeira tabela klasifikasaun ho pontu 4, iha Liga Timorense 2022-2023, hafoin halo impata ho nia adversáriu AD-SLB Laulara ho skor 1-1, Kuarta (22/02) ne’e iha stadium Munsipal Dili.){kind=link}