DILI-(Desportu XYZ) Klube Emmanuel Fc halo terus bá nia adversario Akademica Fc iha estadiun munisipal Dili sabadu semana ne’e ho eskor 4-0.
Jogu foin hahú menutu 5 rede Akademica Fc tenki nakles,hafoin Juvitu Monis aproveita bola baruliho iha liña penalidade laran hodi fora guarda rede Akademica Otilio Guterres hodi muda Skor bá 1-0.
Akademica ne’ebé mak sofre ona golu ida tenta hodi Skor,maibé Emmanuel Fc halo jogu ho bola badak ain bá ain defesil bá Akademica Fc atu ultrapasa bá sira grande area.
Emmanuel Fc ne’ebé mak tun ho jogador lokál halo sira nia tatika jogu hodi tahan metin jogador estranjeiru na’in rua husi Akademica Fc Damianus Putra ho Nortey Kojo atu hatudu sira nia jogu.
Iha menutu 36 Mário Quintao aproveita bola mota sai husi guarda rede Akademica Otilio Guterres nia liman hodi Doko rede Akademica to’o jogu termina premera parte Skor muda bá 2-0.
Hakat bá segunda parte, trenador Akademica Fc Lousinho dos Santos tenta sai husi risku hodi hasai kapitaun Joel Gayu subtitui fali Helmerinu da Costa hodi reforsa meudiu atakante.
Maibé resultadu ne’e seidauk lori vantajen bá sira nia ekipa,tanba sira halo sota kantu dala ha’at,falta ha’at no sota livre dala neen,maibé bola hirak ne’e tolu de’it konsege kona trazetu.
Emmanuel Fc fila halo atake bá grande area Akademica Fc hodi fora kedas rede Akademica Fc iha menutu 56 liu husi Zeferinu Nhew,hafoin simu asistensia bola husi Mário Quintao hodi hasai Skor bá 3-0.
Skor aumenta Emmanuel Fc hasai sira nia velosidade jogu, enkuantu Akademica Fc tenta duni Skor liu sira nia jogu bola a’as.
Maibé Emmanuel Fc nafatin hatudu jogu ho kalma,ikus mai Edit Savio lansa sota bola ho ain los ne’ebé makas halo guarda rede Akademica Otilio Guterres defesil atu salva nia bola to’o rede nakles iha menutu 78 to’o jogu termina Skor muda bá 4-0.
Resultadu ne’e lori Emmanue Fc Rekoila ona Pontos 9 hodi bá tur iha tabela klasifikasaun terseru, enkuantu Akademica Fc mantein ho Pontos 5.
About Post Author
