Dili – Ekipa Emmanuel Fc konsege sai kampeaun iha final Liga Futeból Timor Leste (LFTL) ba segunda devizaun époka 2021, hafoin halakon nia adversáriu Académica Fc ho skor 2-0 iha Stadium Minisipal Dili, Tersa (07/12).
Tanba ne’e treinadór Emmanuel Fc Emelio da Silva hateten, nia parte agradese ba maromak bele tulun sira bele sai kapeaun iha kompetisaun ne’e. No nia mós agradese ba nia jogadór sira ho nia esforsu tomak bele konkista vitória ne’e.
“Sentementu kontente katak história ida ba hau nia karreira treinadór no história ida mós ba Emmanuel Fc, ne’ebé mak foin mai husi terseira divizaun no hakat ba segundu divizaun, no mai hetan kedas primeira lugar iha finál hodi hakat ba primeira divizaun”. Hateten treinadór ne’e.
Treinadór hatete, maske jogadór Emmanuel Fc minímu esperiénsia, tanba foin sa’e husi tersera divizaun no hakat ba segundu divizaun, maibé bele alkansa kedas iha primeira divizaun.
Nia ne’e mós promete, ba oin sira sei presiza tan jogadór sira ne’ebé iha esperiénsia ona joga iha primeira divizaun atu haforsa tan sira nia ekipa hodi kompete iha primeira divizaun époka tuir mai.
Jogadór sira ne’ebé iha ona sei lori nafatin sira tanba mesak ho esperítu as atu kompete, maibé sira sei menus iha esperiénsia, tanba ne’e tenki buka tan jogadór sira foun ruma.
Iha fatin hanesan, treinadór Académica Fc Louzinho dos Santos hateten, nia parte la triste ho derota iha finál ne’e tanba sira nafatin hakat ba primeira divizaun.
Ami la’os lakon esperansa ho ida ne’e, maibé ami nafatin esforsu oinsa mantein iha primeira divizaun.
Nia rekoñese, derota ne’e mós tanba falla iha nia defeza parte karuk la kontrola bola ho di’ak, nune’e jogadór avansadu Emmanuel Fc nian aproveita bola hodi produs golu.
About Post Author
