Dili-Ekipa Ad-SLB Laulara ho As Ponta Leste fahe pontus 3 ba malu iha jogu jornada dahat iha stadium Munisipal Dili, Domingo loro kraik (05/12) ne’e ho skor mantein 0-0.
Nune’e, lori As Ponta Leste okupa iha segunda tabela klasifikasaun ho pontus 7 iha jogu dala tolu no Ad-SLB Laulara okupa ho pontus 6 iha jogu dala hat, Liga Futeból Timor Leste (LFTL) époka tinan ne’e.
Jogu entre ekipa rua iha primeira parte hahú ekipa rua iha ambisaun boot hakarak marka golu ho lais, liu husi kontra atake ba malu.
Maibé la akontese golu, tanba ida-idak mantein nia ekipa atu labele sofre uluk golu ruma.
Ekipa Ad-SLB Laulara la’o ho jogu husi ain ba ain no tenta lori bola tama area grandial liña defeza As Ponta Leste nian, maibé ekipa adversáriu nia defeza hatudu sira disiplina atu halo bola falta.
No mós ba As Ponta Leste ba ho bola ofensivu hodi tenta soe bola as ba liña avansadu atu prosus golu, maibé defeza husi Ad-SLB mantein sira nia liña metin.
Ekipa Ad-SLB Laulara nia jogadór Kornelis Portela (11) hetan falla iha ain hodi troka ho Job Freitas iha minutu 43.
Nune’e mós As Ponta Leste halo mós subtituisaun jogadór hodi hasai Espedito da Concição (10) no hatama João (17) iha minutu 45.
Nune’e to’o jogu primeira parte deskansa, ekipa rua mantein ho skor 0-0.
Hafoin hakatak ba jogu segunda parte, ekipa rua nafatin halo kontra atake malu, atu produs golu ruma, maibé la iha oportunidade di’ak.
Ekipa As Ponta Leste tenta halo subtituisaun jogadór hanesan Ejivanio da Costa (7), Revelino (99) no hatama Marito (9) Domingos Araújo iha minutu 63.
No iha minutu 64 As Ponta Leste nafatin troka nia jogadór Revelino (99) no hatama Domingos Araujo (13).
Ekipa Ad-SLB Laulara halo mós subtituisaun jogadór hodi dada sai Aldo Amaran (27) no hatama Luis da Silva (17) iha minutu 84.
Subtituisaun jogadór Ad-SLB Laulara nian ba daruak iha minutu 84 ne’e jogadór Luis da Silva (17) lansa sutu ameasa kedas halo guarda rede As Ponta Leste nakdoko tanba bola liu husi rai ho makas.
Tanba ne’e to’o jogu segunda parte termina, ekipa nafatin mantein skor 0-0.
Iha konfrénsia imprensa, treinadór Ad-SLB Laulara Efrem Jerónimo hateten, nia kontente tanba ekipa rua fahe pontus hanesan.
Nia promete, ba oin sira sei prepara di’ak liu tan atu hasoru ekipa seluk.
Iha fatin hanesan treinadór As Ponta Leste Francisco Araújo hateten, nia mós kontente tanba bele fahe pontus.
Treinadór ne’e mós rekoñese, ohin sira falla mós iha finalidade no jogadór sira mós diferente ho tátiku jogu ekipa adversáriu nian ho bola ain ba ain.
About Post Author
 ne’e ho skor mantein 0-0.){kind=link}