Dili-Treinadór AS-Marca Fc, Edvin Belo lamenta ho desizaun Arbitrazen nian bainhira konsidera golu ne’ebé nia jogadór hatama ba ekipa adeversáriu hanesan inválidu.
Tanba ne’e treinadór ne’e mós triste tebes iha jogu entre AS-Marca FC ho naran estimadu Matak Malirin bainhira joga kontra Académica Fc, tanba ekipa adeversáriu manan, maibé Arbitrazen sira nia desizaun la justu.
“Hau lahatene, golu ida ohin ne’e golu, maibé derepente dehan fali off side, ida ne’e mai husi ne’ebé”. Hateten treinadór ne’e ba jornalista sira banhira jogu entre ekipa rua remata iha Stadium Munisipal Dili, Kinta (14/10).
Nia haktuir, bola ne’ebé nia jogadór simu hodi hatama golu ne’e, ba husi liña klaran hodi cabesa tama, no parte defeza liña klaran Académica nian antes ne’e hamrik ona kotuk, maibé parte lanya hi’it bandera hodi konsidera katak off side.
Tanba ne’e, nia sujere presiza halo avaliasaun ida kle’an ba árbitu sira kapasidade, nune’e bele fó tan formasaun ba sira atu iha kapasidade ne’ebé di’ak liu tan.
Nune’e lidera fali jogu sira tuir mai labele repete tan eru hirak ne’e.
Relasiona ho treinadór nia krítiku ne’e, jornalista sira husu ba treinadór refere, karik iha hanoin ruma atu hato’o karta formal ruma hodi halo protestu!. Maibé treinadór ne’e hatan lamentasaun sira ne’e sei fila ba eatrutura klubu mak sei hare.
Hanesan treinadór bainhira ekipa lakon ne’e konsikuénsia tenki simu, maibé atu fó hanoin árbitu sira atu atu hasa’e liu tan sira nia profisionalismu. (vidal).
About Post Author
