DILI – Ohin jogador selesaun nasional Timor Leste U-23 no senior hamutuk 29 aranka ba Singapura hodi paritisipa jogu kualifikasaun AFC Asian Cup U-23 no Suziki Cup 2020.
Antes atu aranka ba Singapura jogador, treinador, no prezidente Federasaun Fútebol Timor Leste (FFTL) Francisco Jeronimo hasoru malu ho governu liu Sekretario Estadu no Juventude Desportu (SEJD) Abrão Saldanha hodi fo agradesementu ba jogador sira.
Tanbá ne’e Sekretario Estadu Juventude Desportu Abrão Saldanha hatete, lori governu nia naran hakarak kongratula FFTL mesmu ita iha difikuldade oin-oin, maibé bele prepara ekipa ida atu reprezenta Timor iha AFC Cup tinan ne’e.
“Hanesan governu orgullu ida ba Timor oan hotu bele iha selesaun nasional U-23 ohin aranka ba Singapura, tanbá ne’e governu nia dejeju ba jogador sira tenki susesu iha sira nia misaun no bele hatudu ita nia jogu ne’ebé mak diak liu iha AFC Cup tinan ne’e” relata Abrão ba jornalista iha Sinional Dili (21/10).
Entretantu prezidente FFTL Francisco Jeronimo afirma, maske ekipa selesaun nasional sira nia preparasaun iha situasaun difisil nia laran, maibé FFTL esforsu makas hodi prepara ekipa ne’e ho diak, ikus mai ohin ita nia jogador sira bele aranka ba Singapura.
Nia dehan, mesmu hasoru difikuldade barak, maibé ami garantia ekipa selesaun nasional sei hatudu buat rezultadu diak iha Singapura.
Enkuantu treinador Selesaun Nasional Fabio Miciel informa, jogador sira preparadu atu kompete iha jogu AFC Cup no Suzuki Cup iha Singapura.
“Agora mak ne’e jogador tenki tau importante liu mak mentalidae, fiziku no tatika, tanbá laiha diferente Timor Leste ho nasaun seluk”.
Sorin seluk kapitaun ekipa selesaun nasional Nelson Sarmento Viegas reforsa katak, ho preparasaun ida agora ho trenador Fabio Miecel ne’e lahanesan ho preparasaun ida uluk, tanbá preparasaun ami nian ne’e masimu tebes.
Hanesan kapitaun ekipa, hau sei esforsu makas atu lori rezultadu diak iha jogu AFC Cup no Suzuki Cup iha tinan ne’e.
About Post Author
