DILI – Sekretariu Jeral Federasaun Fútebol Timor-Leste (FFTL) Nelio Izac hateten, ho Konfinamentu Obrigatoriu (KO) Jeral ne’ebé mak ita nia governu hasai hodi bandu atividade hotu para ne’e fo prejudika ba preparasaun Selesaun Nasional Timor Leste ba kualifikasi AFC cup sub 23 iha loron 27 Outobro 2021.
“Ita nia tempu ba selesaun nasional sira atu partesipa iha kualifikasi AFC sub 23 Asian cup hela deit fulan ida ho balun, maibé ho Konfinamentu Obrigatoriu ne’ebé mak ita nia governu hasai ne’e prejudika duni ba preparasaun jogador sira nian” relata Nelio ba Jornalista iha Bairu Grilhos Sesta, (03/09).
Nia dehan, federasaun mos fo hanoin ba ita nia estadu, tanbá ekipa selesaun nasional atu ba partisipa jogu internasional ne’e laos lori federasaun nia naran no defende ema ida rua nia naran, maibé defende dignidade naran estadu Timor-Leste nia naran.
Tanbá ne’e se governu hanoin no laran diak tebes hodi fo espasu ida mai federasaun katak, ita bele halo Konfinamentu Obrigatoriu hotu, maibé fo netik opurtunidade oituan ba ekipa nasional atu halo preparasaun diak liu tan ba jogador sira.
“Ami halo komunikasaun ona ho governu hodi haruka karta ida ba Ministeriu Saude, maibé to’o agora ami seidauk hetan resposta, tanbá ne’e ho media sira nia ajuda bele loke governu sira nia hanoin” tenik Nelio.
Nia haklaken, federasaun sei garantia katak, governu sei bele fo netik autorizasaun ida mai ami hodi halo preparasaun diak liu tan ba jogador sira liu-liu ba selesaun nasional sub 23 ne’ebé mak atu partisipa iha eventu internasional rua hanesan Singapura no Suzuki Cup ne’ebé iha fulan Novembru nia laran atu joga iha pais bo’ot rua hanesan Bankok, Tailandia no Vietnam.
Konaba preparasaun ekipa sub 23 hala’o antes ona, maibé agora situasaun hanesan ne’e ita tenki para, maibé kuandu desportu mak ita prepara tia mak ita hapara entaun preparasaun sira ne’e monu hotu kedas.
“Federasaun lakoi ida ne’e mak ita hakarak atu hetan orientasaun diak ida husi governu hodi hala’o preparasaun fali molok sira aranka iha fulan Outubro tinan ne’e”
Eis governante ne’e katak, total jogador ekipa nasional sub 23 hamutuk 30 no jogador sira ne’e federasaun sei izola hotu iha fatin ida deit atu halo teste Swab ba jogador ne’ebé mak hetan negativu kontinua treinu no ida ne’ebé hetan positivu ami hasai hodi hetan auto karantina ketak.
Federasaun mos sei la autoriza familia atu halo vizita ba jogador sira, tanbá kondisaun sira ami hato’o ona ba governu karik hanoin ekipa nasional sira ne’e atu defende nasaun ida ne’e bele autoriza ami halo treinu.
Ekuantu iha semana ida ne’e Federasaun sei halo teste swab ba jogador ekipa nasional sub 23 hotu atu hare tok sira nia imunidade ne’e, tanbá ida ne’e mak ami hakarak kopera ho governu liu-liu Ministeriu Saude no Sekretariu Estadu Juventude Desportu (SEJD) atu ita serbisu hamutuk, hakotu Nelio.
About Post Author
