DILI-Novidade di’ak ba adeptu futeból iha Ermera, basá Kampu futeból iha Munisípiu Ermera iha oportunidade boot sai uma na’in hoi organiza kompetisaun futeból Kopa FFTL 2020.
Informasaun pozitivu nee mai hosi seriedade órgaun futeból rai laran ne’ebé ba ona munisípiu Ermera.
“FFTL Hala’o Inspesaun ba Estádiu Glenu Komisaun organizadora KOPA-FFTL 2020” sita FFTL liu hosi protal sosiál, sesta (24/07).
“Ohin (24/07) hala’o inspesaun ba estádiu Kafé Glenu hodi haree direta kondisaun atuál estádiu refere, karik presiza reabilitasaun molok realiza jogu KOPA FFTL,” relata portal refere.
“FFTL sei finansia rehabiltasaun no apoiu tan fasilidade balun estádiu Glenu hodi realiza jogu ne’e,” deklara FFTL hanesan fó sai iha sira nia portal.
Antes ne’e, Prezidente Klube Academica FC, Gil da Conceição espresa ba ajénsia tatoli katak klube ne’ebé nia lidera prontu atu kompete ho klube seluk iha eventu Kopa Federasaun Futeból Timor-Leste iha fulan-agostu 2020 ne’ebé sei hala’o iha Dili.
Entretantu, Academica hanesan klube ne’ebé hamahan iha Liga Futeból Amadora (LFA), klube ne’e degrada ona ba Segundu Divizaun Liga Futeból Amadora iha jogu époka 2019 liubá.
Maske degrada iha jogu LFA époka 2019, ekipa jogadór husi Universidade Nasionál Timor Lorosa’e ne’e la rende hodi kompete nafatin iha atividade futeból nasionál hotu.
Sorin seluk, Treinadór Selesaun Nasionál Timor-Leste Sub-19 Eduardo Perreira, simu ho laran ksolok ho kopa FFTL ne’ebé sei organiza rasik hosi FFTL.
Tuir nia hosi eventu ne’e jogadór sira ne’ebé lakon prestasaun no fíziku iha estadu emerjénsia bele rekupera fila fali.
Treinadór ne’e sujere durasaun ba jogu ne’e labele fulan rua de’it tanba, maibé halo liután to’o liga futeból amadora la’o fali mak jogu ne’e termina di’ak liu, atu nune’e kompetisaun iha rai laran labele mate.
Nia observa katak jogadór sira nia prestasaun tun sa’e no balun nia prestasaun laiha konsisténsia tanba menus kompetisaun.(Desportu Timor-Leste)
About Post Author
