Dili- Iha jogu dahuluk, Ad-SLB Laulara nian, sei defisíl kontra Aitana Fc iha tabela klasifikasaun jogu primeira divizaun, Liga Futeból Timor Leste (LFTL) époka tinan ne’e.
Tanba jogadór senior Ad-SLB Laulara nian na’in 7 sei representa hela selesaun nasionál Timor Leste hodi partisipa iha jogu Suzuki Cup iha Singapura.
Nune’e, iha konfrénsia imprensa treinadór Ad-SLB Laulara Efren Jerónimo afirma, aban jogu kontra Aitana Fc sira sei hatun de’it jogadór junior sira ne’ebé iha atu kontra nia adeversáriu.
“Aban ami sei hatun de’it jogadór junior sira, tanba ami nia jogadór senior prinsipal husi na’in sanulu resin ida menus, tanba na’in 7 sei joga hela iha rai liur, ne’ebé ami sei araska uitoan”. Dehan treinadór ne’e iha edifisíu LFTL, Sexta (19/11).
Treinadór ne’e mós iha esperansa, maske ho jogadór junior sira de’it, maibé hakarak manan iha jogu refere.
Hau hanoin jogu ne’e dala ida de’it, ita hotu-hotu hakarak manan, tanba ita hatene Aitana Fc foin dadauk lakon ho Karketu ne’e mós sira hakarak esforsu atu manan. Dehan nian.
Tuir nia katak, daudaun ne’e jogadór senior na’in rua de’it mak oras ne’e iha ekipa Ad-SLB, hanesan Nidio no Filipe. Tanba ne’e treinadór ne’e dehan la sufisiénte ba ekipa atu kompete, maibé ho kompetisaun ne’ebé lao ona kontinua patisipa.
Iha fatin hanesan, asisténte treinadór Aitana Fc Galucho Carvalho mós hateten, aban hakarak hetan pontu tolu husi Ad-SLB.
Nia mós informa, derota ho Karketu Fc ne’e tanba falla iha parte defeza no liña klaran, tanba ne’e sira hadia ona.
Ami nia formatu ne’e sei muda fali, tanba dadauk kontra Karketu ne’e sei subtitui ba line up. Asisténte treinadór Aitana Fc ne’e mós iha esperansa boot hakarak hadau pontu tolu husi Ad-SLB Laulara.
About Post Author
.){kind=link}