Dili-Kablaki Fc nia mehi iha Liga Futeból Timor Leste époka tinan ne’e atu hakat ba divizaun 1 la iha dalan, tanba hala’o jogu ba jornada datolu nian, tenki simu tan derota konta nia adeversáriu Atlético Ultramar ho skor 1-2.
Jogu entre Kablaki Fc ho Ultramar Fc iha minutu hahú primeira parte, Kablaki halo kontra atake husi bola ain ba ain no halo presaun tama ba Ultramar nia área do kampu hodi rejulta bola kantu, maibé la hatudu rejultadu di’ak ba Kablaki Fc atu produz golu tanba tenta husi defeza Ultramar nian.
Ho presaun Kablaki nian ne’e, halo treinadór Ultramar nafatin fó orientasaun ba nia jogadór sira, atu mantein ritmu jogu, maibé nia adeversáriu liña defeza la fó datin atu lori bola liu.
Maibé sorti monu uluk ba Kablaki, tanba liu liu minutu 18 sira fura rede Ultramar nian, liu husi jogadór Juviano dos Santos hodi muda nia ekipa ho skor 1-0.
Golu Kablaki nian ladura kleur, tanba Ultramar responde hikas golu iha minutu 21, liu husi jogadór Albertinho Ribeiro hodi muda skor 1-1.
Golu refere halo Ultramar nia jogu ritmu jogu hahú manas, tanba halo presaun maka’as ba Kablaki Fc hodi halo bola falta beibeik, maibé la iha rejultadu rumah tanba defeza Kablaki nian nafatin hatudu sira nia disiplina jogu.
To’o jogu primeira parte remata, laiha tan golu ruma husi ekipa rua, tanba ida-idak mantein nia ritmu jogu atu salva sira nia ekipa hodi mantein skor 1-1.
Hafoin hakat ba jogu segunda parte, treinadór Kablaki tenki subtituisaun nia jogadór parte avansadu Pedro da Cruz, ne’ebé subtitui husi nia sublentu Angelito Oliveira.
Maske Kablaki halo subtituisaun ba nia jogadór, maibé Ultramar lansa kedas ameasa.
Aleim ne’e mós treinadór Ultramar halo nia subtituisaun ba nia jogadór Lexi Romario, subtitui husi sublentu Arsenio Amaral.
Hafoin iha minutu 71, Ultramar produs tan golu daruak, liu husi jogadór Jaserlito de Jesus, hodi muda skor 2-1.
Ho golu daruak ne’e halo Ultramar tenki troka tan nia jogadór Jaserlito no hatama fali Manuel Oliveira atu asegura sira ekipa labele sofre golu nia adeversáriu.
No Kablaki mós troka nia jogadór Domingos Nunes no hatama Eduardo da Costa. Maske halo subtituisaun maibé Kablaki la iha mudansa golu ruma, tanba liña defensivu Ultramar nian tenta salva sira nia ekipa ho di’ak atu labele impata.
Maibé iha ikus 90+3 extra ba 3 minutu, Ultramar nia jogadór Pedro Fernandes tenki hetan kartaun mean tanba kontra regras jogu.
Tanba ne’e jogu segundu parte termina, vitória ba Atlético Ultramar 2-1.
Tanba ne’e treinadór Atlético Ultramar Moises da Silva informa, maske rekolla tan pontu 3 husi Kablaki, maibé la garante atu lidera iha tabele klasifikasaun grupu B, tanba iha ekipa seluk hanesan Nagardjo mós iha oportunidade.
Hau dehan ba jogadór sira, mantein kalma, nafatin treinu atu bele hasoru jogu tuir mai. Nia dehan”.Hateten treinadór ne’e hafoin ekipa rua remata jogu iha kampu Demokrasia, Kuarta (26/10).
Eis treinadór Sporting de Timor ne’e mós dehan, iha jogu tuir mai hasoru Santa Cruz, iha ona estratéjia ida hodi hetan vitória.
Treinadór Kablaki Fc João Fernandes hateten, maske derota ho Atlético Ultramar, maibé nafatin esforsu hodi hetan vitória iha jogu rua tuir mai, tanba ne’e sai esperiénsia ida ba jogu iha époka tinan oin mai.
“Ohin joga ne’e ami nia liña klaran di’ak, maibé defeza mak falla liu, tanba ne’e mak Ultramar aproveita hodi produz golu”. Dehan Nia. Kablaki hala’o ona jogu ba datoluk no hetan de’it pontus 4 no hela jogu rua kontra Nagardjo Fc no Imanuel Fc iha tabela klasifikasaun grupu B.
About Post Author
