Dili-AS Ponta Leste ho Lalenok United Fc sei disputa hela ba jogadór Mumi Mohammed tanba jogadór refere naran tama iha lista klube rua ne’e ho naran hanesan atu partisipa iha Liga Futeból Timor Leste (LFTL) époka tinan ne’e.
Jogadór ne’ebé naran dupla iha klube rua ne’e halo órgaun LFTL no Presidente klube sira preokupa tebes.
Kazu ne’e indentifika husi órgaun LFTL, hafoin halo technical meeting ho presidenti no representante klubu sira, antes atu dada sorteio ba klube 7 husi primeira divizaun hodi partisipa iha Liga Futeból Timor Leste divizaun 1 époka tinan ne’e.
Tanba ne’e iha intervensaun diretór verifikasaun LFTL, José Carvalho nian katak, iha technical meeting ne’e atu verifika mós lista jogadór sira ne’ebé naran tama iha klube rua ho naran hanesan (dupla), nune’e bele rezolve antes hakat ba kompetisaun iha fulan Novembru ne’e.
“Iha lista jogadór balun husi klube sira ne’e sai hela preokupasaun ba ami, ita hare hanesan, AS Ponta Leste ho Lalenok United Fc, jogadór Mumi Mohammad ne’e nia naran tama hotu iha klube rua ho naran hanesan. Tanba ne’e klubu sira tenki rezolve. Esplika diretór ne’e iha hotel D’CITY Vila Verde, segunda (25/10) ne’e.
Hatan ba preokupasaun ne’e, presidenti AS Ponta Leste, Ósorio Florindo esklarese, Mumi Mohammad nia kontratu hahú antes LFTL seidauk anúnsia atu joga.
“Ami selebra kontatu ho nia, desde ita atu hahú joga, maibé la realiza tanba situasaun Covid-19, maibé ninia vida tomak durante Covid-19 nia laran Ponta Leste nafatin halo tratamentu. Tanba ne’e to’o agora ninia kontratu sei válidu, no ami iha baze komprovativu”. Hateten Presidente AS Ponta Leste ne’e.
Aleim de rona tiha esplikasaun husi presidenti AS Ponta Leste, parte órgaun LFTL fó resposta hikas katak, fó loron rua ba klube rua atu buka solusaun.
Maibé parte pozisaun husi presidenti AS Ponta Leste Ósorio Florindo nian katak, Lalenok United mak buka Ponta Leste, liu husi karta formal ruma atu rezolve.
Lalenok mak buka ami atu resolve, maibé la bele liu husi loron rua, se liu husi loron rua, jogadór refere ami nian, tanba ami mak kontratu uluk ho nia. Nia dehan.
Entretantu, representante husi Lalenok United mós esplika, antes sira atu halo kontratu ho jogadór Mumi Mohammad, sira husu uluk ninia pozisaun kontratu ruma. Maibé Jogadór refere fó reaposta katak, nia livre husi kontratu husi klube hotu.
Nia mai hateten hanesan ne’e mak ami halo kontratu ho nia.
Iha diskusaun lubuk ba kazu ne’e, parte LFTL foti solusaun fila fali ba klube rua atu konsulta malu hodi sulusiona asuntu ne’e, hafoin pasa informaun ba órgau liga antes tama iha kompetisaun. Aleim de kazu AS Ponta Leste no Lalenok United, LFTL mós indentifika kazu hanesan Karketu Fc ho Ad-SLB Laulara, tanba rejistu jogadór ida ho naran hanesan iha klubu rua, maibé to’o diskusaun ikus, klube sira ne’ebé hetan disputa ba jogadores sira konkorda malu atu resolve iha tempu besik.
About Post Author
