DILI – Maudoko FC kontinua hatudu nia performa brillante iha jogu kontinuasaun jornada datolu segundu divizaun Liga Timorense de Fútebol Femenino, hafoin halakon nia adversariu UNITAL FC ho skor 5-0 iha kampu demokrasia Dili Sesta (01/10).
Jogu foin hahu iha minutu 10, jogador Maudoko FC Leonia Soares hamanas ona rede UNITAL hafoin hetan bola muta husi guarda rede Unital Efiania de Oliveira nia liman hodi halo rede nakles ba 1-0.
Ho golu ne’e halo Maudoko FC fiar a’an liu tan hodi la fo biban ba nia adversariu Unital atu ultrapasa ba sira nia lina defeza.
Iha ne’ebé Unital tenta atu sai husi presaun nia laran, maibé Maudoko kontinua ho nia ritmu jogu husi ain ba ain, ikus mai guarda rede Unital Efiania Oliviera labele salva bola husi suta livre ho ain los jogador Maudoko Leticia Claudia hodi hatur skor 2-0 iha minutu 23.
Unital fila halo mudansa jogu hodi subtitui jogador husi liña klaran no avansadu, maibé mudansa hirak ne’e lalori sorte diak ba ekipa Unital.
Maudoko kontinua halo jogu iha anin leten, Unital nia jogu hahu mihis, ikus mai Maudoko fura tan rede Unital ho golu tolu tui-tuir malu liu husi jogador Evelia Amaral menutu 24, Carlota Tilman 34, no 40 hodi termina primeira parte.
Kontinua ba segunda parte, Unital halo mudansa jogu hodi fo presaun ba Maudoko fc liu husi suta livre dala 4 no kantu dala rua, maibé bola rua deit mak kona alvu to’o jogu termina.
Reszultadu ne’e lori Maudoko rekolla ona pontu 6 husi jogu dala tolu, enkuantu Unital FC halo jogu dala tolu derota dala rua no vitoria dala ida ho pontos 3.
About Post Author
