DILI – Prezidente Lalenok United FC Pedro Belo informa, klubu Boavista FC Timor bele rekruta tia jogador estranjeiru hotu mos Lalenok United sei la hakfodak iha jogu Liga Futebol Timor-Leste (LFTL) tanba Lalenok hatudu ona rezultadu dala ha’at tui-tuir malu.
“Ita hare Boavista nia rekrutamentu jogador estranjeiru husi selesaun nasional Indonesia Ferdinang Sinaga hodi doko iha media sosial no media sira, maibe Lalenok nonok deit tun kampu mak ita hare” relata Pedro ba jornalista iha SEJD, Sesta (05/02).
Nia hateten istoria hatudu ona katak Lalenok United sai ona kampiaun dala ha’at tui-tuir malu mak hanesan Kopa FFTL, Liga, Taca 12 Novembro no Super Taca.
Jogador sira ami prepara ona iha klubu Lalenok hamutuk 23 inklui estranjeiru nain tolu no lokal 19, maibe sei iha tan jogador estranjeiru nain rua sei mai hamutuk tan ho Lalenok hodi ba haforsa iha jogu AFC Cup ne’ebe mak sei hala’o iha fulan Abril 2021, dehan Pedro.
Nia afirma konaba Liga, Lalenok la hakfodak ho klubu seluk, Lalenok rekruta jogador estranjeiru barak hodi partisipa iha jogu AFC Cup atu labele derota hanesan tinan kotuk.
Tan ne’e Lalenok nia jogador Abanda Rahman husi Indonezia hein deit dalan loke jogador refere bele mai ona Timor, tanba jogador refere asina ona kontratu ho Lalenok iha semana kotuk. (Eug).
About Post Author
