DILI – Ekipa kampiaun Liga Futeból Amadora LFA edisaun tinan 2019 ho seguru hakat ba oitavu finais hafoin manan jogu datolu iha grupu A kontra Santa-Crus FC. kuarta, (16/09).
Vitória lori Lalenok United seguru ba Oitavu finais mai hosi golu rua hosi jogadór, Elias Mesquita iha minutu 20′ 53′, aumenta hosi Paulo Gali iha minutu 34 no Hermenio de Souza iha minutu 37 hodi lidera jogu kontra Santa Crus FC 4-0.
Iha jogu primeira parte, lalenok domina bola no barak liu ladún halo presaun maibé sempre halimar pasajen bola hosi ain ba ain barak liu halo atake hodi hamosu golu, iha primeira parte hamosu de’it 3-0. Tama fali segunda parte aumenta tan golu ida.
Ba oras ne’e, Lalenok United seguru ho pontu sia hosi joga dala tolu ho vitória dala tolu no iha sei restu jogu ikus kontra DIT FC.
Iha posiblidade boot ba Lalenok United atu manan tan jogu ikus kontra DIT FC haree hosi performa DIT nian iha kopa FFTL jogu dala rua manan ida no lakon ida.
Aleinde Lalenok, antes iha ona Klube Ponta Leste nu’udar ekipa dahuluk ho susesu hakat ain ba faze oitavu finais, rekolla mós pontu 9 hosi jogu tolu no falta jogu restu ida.
Kontribuisaun la dook hosi avansadu kamizola 27, Silveiro Garcia ne’ebé marka tan golu rua iha jogu datoluk konta Klube Fitun Estudante Loro Sa’e hodi arkiva ninia prestasaun durante partisipa Kopa FFTL 2020. (ato)
About Post Author
