Dili-Ekipa Lalenok United Fc hakru’uk ba As Ponta Leste ho skor mihis 0-1 iha jogu jornada datoluk Liga Futeból Timor Leste (LFTL) ba primeira divizaun époka tinan ne’e.
Treinadór Lalenok United Fc Gaspar Amaral iha konfrénsia imprensa Sexta (26/11) iha stadium Munisipal dili katak, iha jogu primeira parte nia jogadór sira joga tuir tiha ritmu jogu Ponta Leste nian, nune’e sira defisíl atu hetan bola sofre golu.
“Golu ida primeira parte ne’e hanesan fallansu ida, maibé hafoin jogu segunda parte ami hadia hodi hetan oportunidade lubuk, maibé jogadór sira mak falla aproveita ho di’ak”. Dehan treinadór Lalenok United ne’e.
Treinadór ne’e mós esplika, sira falla mós iha komunikasaun jogadór entre parte defeza no liña klaran, tanba liña rua fó distansia jogu dok liu.
Iha fatin hanesan, treinadór As Ponta Leste, Francisco de Araújo mós dehan, rekolla vitória ne’e tanba antes ne’e estuda ona Lalenok United nia jogu, nune’e hodi uza tátiku ne’ebé di’ak, hodi manan ekipa adversáriu.
Jogu ohin ne’e jogu ida ne’ebé ho emosaun no intensidade ne’ebé aas, tanba ne’e mak hau tenki uza tátiku ne’ebé di’ak bele manan jogu ne’e. Hakotu treinadór As Ponta Leste.
About Post Author
