DILI-Ekipa jigante Lalenok-FC seidauk halo preparasaun másimu hasoru kopa FFTL ne’ebé sei organiza no komesa iha fulan Agostu nia laran.
“Ami seidauk iha preparasaun ofisial,” deklara treinadór atuál Lalenok-FC, Simon Elissetche ba Timor Post iha kampu lalenok, segunda (20/07).
Tuir treinadór orijen hosi nasaun Xile ne’e, Kopa FFTL komesa iha 20 de Agostu maibé ne’e seidauk oráriu fixu.
Eis treinadór Assalam FC, iha jornada LFA edisaun dahuluk ne’e haktuir oras ne’e ninia ekipa seidauk iha Preparasaun ofisial tanba jogadór barak hola parte iha ekipa nasionál.
Entretantu ba oras ne’e, Lalenok so halo jogu amizade ho ekipa sira seluk, hanesan foin lalais halo ho ekipa Fitun Estudante Loro sa’e (FIEL).
“Ami foka ba haree jogadór liña daruak nian halo experiment estratéjia no maneira joga,” haktuir Simon katak lalenok nafatin la’o ho jogadór sira ne’ebé iha liña segundu, inklui jogadór estranjeiru no mós jogadór lokál balun.
Tanba ne’e atu ko’alia kopa FFTL , so loron 3 Agostu maka nia haree oinsá ofisializa preparasaun. Agora so fó tempu evalua ba jogadór segundu liña nian.(ato)
About Post Author
