Dili – Ekipa Kuala Kangsar FC nian iha Malázia, ofisiamente halo ona kontratu ho futebolista ho liña avansadu husi Ad-SLB Laulara, João Pedro (JP) hodi haforsa sira nia ekipa ba époka 2021.
Tuir informasaun ne’ebé jornalista desportu.xyz asesu liu husi fanpage Kuala Kangsar FC nian ne’ebé sita mós katak, bemvindu ba João Pedro hanesan atakante Timor Leste ne’ebé legítimu ona, tan ne’e hamutuk ho ekipa Kuala Kangsar FC nian, nune’e hodi bele hasoru kompetisaun liga époka 2021.
Entretantu iha entrevista ho sekretariu jerál AD-SLB Laulara, Domingos Caero informa, los duni João Pedro assina ona kontratu ho ekipa terseira divizaun Kuala Kangsar FC iha Malaysia, iha Tersa (09/03) ne’e.
“Loos, nia assina ona kontratu ho klubu Kuala Kangsar FC horsehik, nia kontratu ho durasaun tinan ida, maibé possibildade bele aumenta. Informasaun ne’e jornalista desportu.xyz asesu liu husi via mensajen WattsApp ho sekretariu jerál AD-SLB Laulara, Domingos Caero, Kuarta (10/03/2021).
Nia mós dehan, bainhira nia halo komunikasaun ho JP, jogadór ne’e fó nia mensajen ida katak, nia sei mantein nia profisaun hanesan jogadór, tanba joga bola ho profisionál, labele joga tan osan, maibé joga nu’udaar profisaun ida atu kontribui ba ita nia estadu Repúblika Demokrátika Timor Leste (RDTL).
Sekretária SLB ne’e mós deklara, JP nia presensa iha Kualalumpur nu’udar mehi furak ida ba atividade desportu Timor Leste, liu-liu modalidade futeból.
JP la’os representa SLB de’it, maibé povu Timor Leste tomak, SLB nia knaár impportante mak atu halibur poténsia no talentu brilante foin sa’e sira, hodi kontribui ba ekipa nasionál Timor Leste. Nia hateten.
Entretantu, Sekretáriu SLB ne’e relata liu tan, antes ne’e mós JP nia naran sira hatama hotu iha lista SLB nian, atu partisipa mós iha jogu Liga Futeból Timor Leste époka 2021, maibé mellor markadór SLB ne’e sei la joga tanba nia hetan ona kontratu ho klubu refere.
Joao Pedro hanesan mós jogadór importante ida iha Timor Leste, tanba antes ne’e mós hatudu performance áas tebes iha kopa AFF SUZUKI iha tinan 2018, nune’e joga mós iha klubu Sporting Braga. (desportu.xyz).
About Post Author
