DILI – Maske hetan vitoria 2-1, maibé treinador Emmanuel fc Emeliano Da Silva promete sei hadia diak liu tan iha parte liña avansadu hodi hein jogu segundu kontra nia adversariu Santa Cruz fc
Ekipa Emmanuel fc susesu hatun nia adversariu Nagardjo fc ho skor 2-1 iha jogu segundu divizaun grupu B Liga Fútebol Timor Leste (LFTL) ne’ebé mak halao iha Estadiun Munisipal Dili, Sesta (15/10).
Enkuantu golu Emanuel fc produz husi jogador Jonatas Pereira iha minutu 82, no Filomenio Savio iha minutu 85, no golu Nagarjdo fc marka husi jogador Albertu Tilman iha minutu 64.
“Ekipa rua ne’e joga diak, primeiru ekipa Nagardjo preparadu iha vantajen esforsu a’an sira mak hatama uluk Golu ba Emanuel, maibe iha mudansa jogador ikus mai rezultadu nakfila ba Emanuel ho rezultadu 2-1” dehan Emiliano ba jornalista sira iha Estadiun Munisipal Dili, Sesta (15/10).
Nia subliña, jogu tuir mai ami sei halo avaliasaun ba jogador sira atu aproveita vantajen hodi hetan pontu tolu. Ida ne’e akontese iha jogu dahuluk.
Jogu daruak Emanuel FC sei hadia fallansu iha liña sira ne’ebé mak iha, atu nune’e hetan rezultadu diak iha jogu tuir mai.
“Fallansu iha jogu dahuluk ne’ebé jogador sira infrenta nu’udar evaluasaun ida ba estratéjia treinador atu halo tatiku iha jogu daruak bainhira kontra ekipa adversariu Santa Cruz hodi rekolla pontu tolu”.
Jogu jornada daruak Emanuel FC sei hasoru ekipa Santa Cruz FC ne’ebé hetan pontu hanesan ho ekipa Emanuel.
Entretantu asistente treinador Nagardjo FC Evangelino da Costa hatete, derota ne’ebé nia ekipa hetan iha jornada dahuluk kontra Emanuel FC tanba jogador nia estamina tun iha parte daruak.
“Ami monu estamina iha Segunda parte hanesan ohin ita hotu hare, parabens ba ekipa Emanuel FC sira nia jogu diak maioria jogador selesaun nasional sub 19”.
Nia hatutan, fallansu ida ne’ebé Mak ekipa sei hadia nune’e iha jogu tu’ir mai bele hetan rezultadu positivu.
Nagardjo FC mós sei halo esforsu máximu atu ultrapasa ba iha primeira divizaun maske todan tanba hetan derota iha primeiru jogu.
Atu ultrapasa ba primera divizaun ekipa sei halo preparasaun máximu iha jornada tu’ir mai bainhira joga kontra Fitun Estudante iha semana oin.
“Ami iha preparasaun bo’ot para atu ultrapasa ba pimeira divizaun ida ne’e mak ami nia mehi.”
Iha jogu sempre ekipa ida lakon ka manan maibé jogu ida ohin sai hanesan referênsia ba ami hadia ekipa sai diak liu tan.
About Post Author
