DILI-(Desportu XYZ) Golu Uniku husi Rufino Walter Gama lori Coração/Atletico Ultramar sai husi jona mean, hafoin halakon Aitana Fc 1-0 iha jogu kontinuasaun primeiru divizaun liga Timorense epoka 2022/2023 ne’ebé mak hala’o iha estadiun munisipal Dili, Kinta (13/04).
Jogu hahú ekipa Coração Fc fó kedas presaun bá Aitana Fc liu husi suta on target iha liña penalidade kotuk ne’ebé jogador Yohanes Gusamao lansa sei hetan blokea husi guarda rede Celestinu da Costa.
Ladura kleur Rufinu Gama hekis ona Aitana nia rede,hafoin nia lansa suta bola ne’ebé makas halo guarda rede Celestinu da Costa labele salva bola hodi muda Skor bá 1-0 iha minutu 9.
Skor refere halo Coração Fc nia jogu kontinua aumenta liu tan, enkuantu Aitana Fc nia jogu monu iha liña klaran difisil bá Aitana atu hatudu sira nia jogu liu husi bola ain bá ain.
Yohanes Gusamao no Rufino Gama hatudu sira nia jogu ho bola crossing halo deveza Aitana Fc nia Lutu nakloke fó terus bá guarda rede Celestino da Costa tenki esforsu makas husi ameasa ne’ebé mak Coração halo liu suta kantu, Falta no suta livre.
Aitana Fc esforsu makas ho bola a’as, maibé sira fó perigu dala rua bá guarda rede Coração Alexandre Leao liu husi Kabesada Mamoudou Conde, maibé sei hetan salva Alexandre to’o primeira parte termina.
Kontinua bá segunda parte, trenador Aitana Fc koko muda sira nia estratejia jogu hodi troka defeza hatama Avansadu atu duni tuir skor.
Maibé Coração Fc nafatin mantein sira nia jogu hodi la fó biban Aitana Fc atu ultarapasa bá sira guarda rede.
Iha minutu 87 Yohanes Gusamao lori bola ho ain karuk liu husi parte eskerda hodi ultrapasa defeza Francelino Belo, maibé bola ne’ebé nia suta sei salva husi defeza Francelino hodi bola bá kantu.
Laiha tan golu ruma bá ekipa rua to’o jogu termina vitória bá Coração Fc ukun 1-0.
Vitória ne’e lori Coração rekolla ona pontos 8 hodi sai husi zona mean, enkuantu Aitana Fc mantein iha Jona mean ho pontos 4.
Ekipa Coração FC sei iha jogu rua hasoru Assalam no Academica, ekipa Aitana mos sei iha jogu rua hasoru Ponta Leste no Emmanuel.
Tabela Klasifikasaun LFTL Divizaun 1
About Post Author
