DILI – Trenador Ponta Leste Francisco De Arauju ne’ebé subtitui eis treinador Eduardo Pereira, sei garantia lori Ponta Leste hatudu rezultadu diak no mehi hakarak kampiaun iha Liga Fútebol Timor Leste (LFTL) epoka 2021-2022.
“Hau iha konfiansa bo’ot tebes maske husi manejementu klubu nia target atu mantein deit iha primeiru divizaun, maibé hau esforsu atu liu tan ida ne’e bele ba kampiaun iha epoka 2021” dehan Francisco ba desportu.xyz liu husi via Whatsapp Kuarta (06/10).
Nia sublina, nia konfia metodologia de trenu no esperensia konese ekipa adeversariu ne’ebé mak agora iha liga primeiru divizaun hanesan ekipa Ponta Leste laos ekipa ki’ik, tanbá klubu ne’e maioria jogador esperensia.
Tanbá ne’e ami perpara jogador fiziku no psikologiku diak, hau garante jogu primeiru ami trasa vitoria, tanbá konfiansa ba jogador sira hau espera jogador sei fo rezultadu ne’ebé mak diak ba klubu Ponta Leste.
“Ami perpara jogador sira durante semana rua ona, iha etapa primeiru hau sei fokus ba hadia kualidade fitness jogador ne’ebé mak durante ne’e paradu total, atu nune’e mantein sira nia nivel fisiku ho jogador ne’ebé ativu hela iha selesaun nasional senior U-23 no U-19”.
Eis treinador Assalam ne’e afirma, total jogador Ponta Leste agora hamutuk 18 no klubu mos sei halo negosiasaun ba Jogador estranjeru Dani Donkor ne’ebé mak antes ne’e joga ona hamutuk ho Ponta Leste iha tinan kotuk, maibé negosiasaun sei laos hela.
Kona ba hau nia kontratu iha Ponta Leste iha epoka ida ne’e deit, karik iha rezultadu diak fila ba manajementu klubu nia desizaun. Enkuantu Ponta Leste aban sei halo Try Out kontra ekipa segundu divizaun Emanuel Fc iha kampu Demokrasia Dili Oras 07:00.
About Post Author
